შაქარაშვილის საქმის პროკურორის, დავით ყაზარაშვილის განცხადებით, 19 წლის ფეხბურთელის მკვლელობაში ბრალდებულები სანამ საგამოძებო ორგანოებში მივიდოდნენ, კვალი გააქრეს. ყაზარაშვილი აღნიშნავს, რომ ბრალდებულებს დნმ-ს ნიმუშების აღებამდე, ფაქტობრივად, ფრჩხილები დაჭრილი ჰქონდათ. მისივე თქმით, ისინი საგამოძიებო ორგანოებში მომზადებულები მივიდნენ.

"ამ ექსპერტიზის დასკვნებში საუბარია იმაზე, რომ ბრალდებულების მიკრონაწილაკები არ აღმოჩნდა ტანსაცმელზე. ბრალდებულები როდესაც ჩვენთან მოვიდნენ და როდესაც ჩვენ ნიმუშები ავიღეთ, ფაქტობრივად, ფრჩხილები ყველას დაჭრილი ჰქონდა. მათ არა მხოლოდ ტანსაცმელზე და სხეულზე, არამედ ტელეფონებშიც წაშალეს ინფორმაცია და გამოძიებას კვალის აღმოჩენის შესაძლებლობა მოუსპეს", — განაცხადა ყაზარაშვილმა ბრიფინგზე.

19 წლის ფეხბურთელი, გიორგი შაქარაშვილი 19 ივნისს დაიკარგა. 4-დღიანი ძებნის შემდეგ, 22 ივნისს, გიორგი შაქარაშვილი ცხედარი მდინარე არაგვში იპოვეს.

შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმეს. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.