ლიეტუვის საგარეო საქმეთა მინისტრის, ლინას ლინკევიჩის ცნობით, ბელარუსში მიმდინარე საპროტესტო გამოსვლების მხარდასაჭერად, ვილნიუსში გამართულ 30-კილომეტრიან ცოცხალ ჯაჭვში 50 000-ზე მეტი ადამიანი გაერთიანდა.

"ძალიან ამაყი ვარ ლიეტუველებით მათი გულწრფელი, უპრეცედენტო მხარდაჭერისთვის, რომელიც ბელარუსი ხალხის მიმართ გამოხატეს და მხარი დაუჭირეს მათ ბრძოლას დემოკრატიის, სამართლიანობისთვისა და ღირსებისათვის", — წერს ლიეტუვის საგარეო საქმეთა მინისტრი, ლინას ლინკევიჩუსი ტვიტერზე.

სოლიდარობის აქციაში ლიეტუველი პოლიტიკოსებიც მონაწილეობდნენ, მათ შორის, ყოფილი პრეზიდენტი, დალია გრიბაუსკაიტე და მოქმედი პრეზიდენტი, გიტანას ნაუსედა.

"სამი ათწლეულის წინ, ლიეტუველებმა თავიანთ ლატვიელ და ესტონელ ძმებთან ერთად ცოცხალი ჯაჭვი შეკრეს. ბალტიის გზით თავისუფლების მესიჯი გაიგზავნა. დღეს, ბელარუსები მსოფლიოს თავიანთ მესიჯს უგზავნიან: მათ თავისუფლება სურთ", — ნაუსედამ დაწერა ტვიტერზე.

23 აგვისტოს ბელარუსის დედაქალაქ მინსკში კიდევ ერთი მასშტაბური აქცია გაიმართა. 100 000-ზე მეტი ადამიანმა ხელახალი საპრეზიდენტო არჩევნები და ალექსანდრე ლუკაშენკოს გადადგომა კიდევ ერთხელ მოითხოვა.

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.