ევროკავშირი ბელარუსის პრეზიდენტს, ალექსანდრე ლუკაშენკოს, სანქციებს უწესებს. ამის შესახებ ევროკავშირის წევრი ქვეყნების 27 საგარეო საქმეთა მინისტრი შეთანხმდა.

მათი გადაწყვეტილებით, ლუკაშენკოს არჩევნების შემდგომი ზეწოლა საპასუხოდ სანქციათა ახალ ტალღას მიიღებს. შედგება სია, სადაც ის პირები მოხვდებიან, რომლებმაც ლუკაშენკოსთან ერთად მონაწილეობა მიიღეს მომიტინგეთა უფლებების შეზღუდვაში. აღნიშნული სანქციები გავრცელდება ვიზის მიღებასა და ფინანსური აქტივების დაბლოკვაზე.

"სანქციები დაწესდება რეპრესიაზე პასუხისმგებელ იმ პირებზე, რომელთა სახელები სიაში მოხვდება", — განაცხადეს ევროკავშირის ოფიციალურმა პირებმა.

სანქციების დაწესების თაობაზე ინფორმაციას ლიეტუვაში ევროკავშირის წარმომადგენლობის მეთაურიც აქვეყნებს.

"ევროკავშირის ქვეყნების საგარეო საქმეთა მინისტრები ლუკაშენკოს რეჟიმზე ინდივიდუალური სანქციების დაწესებაზე შეთანხმდნენ", — წერს იგი.

ვიდრე ევროკავშირი სანქციების დაწესების გადაწყვეტილებას შეათანხმებდა, პროცესის მიმდინარეობას ევროკომისიის პრეზიდენტი, ურსულა ფონ დერ ლეიენიც გამოეხმაურა და აღნიშნა, რომ აუცილებელია სანქციები იმ პირების წინააღმდეგ, ვინც ხელყო დემოკრატიული ღირებულებები და დაარღვია ადამიანის უფლებები.

"მე დარწმუნებული ვარ, ევროკავშირის საგარეო საქმეთა მინისტერიალი გაამჟღავნებს ჩვენს ძლიერ მხარდაჭერას იმ ადამიანების მიმართ, ვინც ბელარუსში ფუნდამენტური უფლებებისა და დემოკრატიის დასაცავად იბრძვის", — განაცხადა ლეიენმა.

მინსკში მასობრივი საპროტესტო გამოსვლები მას შემდეგ დაიწყო, რაც ეგზიტპოლის შედეგების მიხედვით, ქვეყნის მოქმედი პრეზიდენტი, ალექსანდრ ლუკაშენკოს ამომრჩეველთა 79.7 პროცენტი უჭერს მხარს. მის მთავარ მოწინააღმდეგეს, სვეტლანა ტიხანოვსკაიას კი 6.8 პროცენტიანი მხარდაჭერა ჰქონდა. ქვეყანაში ალექსანდრე ლუკაშენკოს 26 წლიან მმართველობას აპროტესტებენ და არჩევნების შედეგების ბათილად ცნობას ითხოვენ. უკვე მეხუთე დღეა ხელისუფლება საპროტესტო სულისკვეთებას სასტიკი ქმედებებით ახშობს.