ამერიკის შეერთებული შტატების სახელმწიფო დეპარტამენტის მიერ გავრცელებული განცხადების მიხედვით, აშშ ღრმად შეშფოთებულია 9 აგვისტოს ბელარუსში ჩატარებული არჩევნების გამო, რომელიც მათი თქმით, არ იყო სამართლიანი და თავისუფალი.

სახელმწიფო დეპარტამენტის განცხადებით, პროცესი ჩაშალა კანდიდატებისთვის კენჭისყრაზე დაწესებულმა შეზღუდვებმა, დამოუკიდებელი დამკვირვებლების არდაშვებამ საარჩევნო ყუთებთან და მშვიდობიანი პროტესტანტებისა და ჟურნალისტების დაკავებამ.

"ვწუხვართ, რომ ეუთო/ოდირის დამკვირვებლებმა არ მიიღეს დროული მიწვევა ხმის მიცემის პროცესზე დასაკვირვებლად. თავისუფალი და სამართლიანი არჩევნების გულწრფელად კონკურენტულ გარემოში ჩატარდება ყველა მთავრობის ლეგიტიმაციის საფუძველია", — ნათქვამია განცხადებაში.

სახელმწიფო დეპარტამენტი მიუთითებს იმაზეც, რომ ბელარუსის მთავრობამ პატივი უნდა სცეს ბელარუსელთა უფლებას, მონაწილეობა მიიღონ მშვიდობიან შეკრებაში, თავი შეიკავოს ძალის გამოყენებისგან და გამოუშვას უმიზეზოდ დაკავებულნი.

"ჩვენ ვგმობთ მიმდინარე ძალადობას მომიტინგეების წინააღმდეგ და ოპოზიციის მხარდამჭერთა დაკავებას, ისევე როგორც ინტერნეტის გათიშვის მცდელობას არჩევნებსა და დემონსტრაციებზე არსებული ინფორმაციის გავრცელების ხელის შეშლის განზრახვით", — ვკითხულობთ განცხადებაში.

სახელმწიფო დეპარტამენტი ასევე ამბობს, რომ აშშ, როგორც ბელარუსის მეგობარი, მხარს უჭერს მათ დამოუკიდებლობას და სუვერენულობას, ისევე როგორც ხალხის სწრაფვას დემოკრატიული მომავლისა და კეთილდღეობისკენ.

9 აგვისტოს ბელარუსში საპროტესტო გამოსვლები საპრეზიდენტო არჩევნებს მოყვა. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

ბელარუსში პროტესტი გრძელდება. პროტესტანტები არჩევნების შედეგების გაუქმებას და ხელახლა მის სამართლიან გარემოში ჩატარებას ითხოვენ.