ლუკაშენკოსა და პუტინის სატელეფონო საუბრის შესახებ ინფორმაცია კრემლის ოფიციალურ გვერდზე გამოქვეყნდა. ტექსტში ვკითხულობთ:

"ბელარუსში საპრეზიდენტო არჩევნების შემდეგ რესპუბლიკაზე გარეგანი ზეწოლის ჭრილში სიტუაციის განხილვა გრძელდება. რუსეთმა კიდევ ერთხელ დაადასტურა თავისი მზადყოფნა, საჭიროების შემთხვევაში, დაეხმაროს ბელარუსს კოლექტიური უსაფრთხოების ხელშეკრულების ორგანიზაციის მეშვეობით".

კრემლის განცხადებაში არ არის დაკონკრეტებული, რა გარეგანი ზეწოლა იგულისხმება. თუმცა კოლექტიური უსაფრთხოების შესახებ ხელშეკრულების ორგანიზაციაზე ლუკაშენკოც საუბრობს და აღნიშნავს, რომ ბელარუსში შექმნილ სიტუაციაში რუსეთის დახმარება სწორედ ამ შეთანხმების ფარგლებში განიხილება.

შეთანხმების ნაწილია კოლექტიური სწრაფი რეაგირების ძალები (ОДКБ), რომელიც დაახლოებით 18 000 ადამიანს აერთიანებს და მათი მთავარი დავალება მუდმივი სამხედრო მზადყოფნის დემონსტრირება, ორგანიზაციის წევრი ქვეყნების ტერიტორიაზე სამხედრო დანაყოფების განთავსება და ნებისმიერი ტიპის არეულობაში ან საგანგებო სიტუაციაში ჩართვა და ლოკალიზებაა. ამ ორგანიზაციის წევრები კი ამ ეტაპზე არიან რუსეთი, ბელარუსი, სომხეთი, ყაზახეთი, ყირგიზეთი და ტაჯიკეთი

პუტინის მიერ ლუკაშენკოსთვის აღთქმული დახმარება სწორედ ამ სამხედრო ძალების ჩარევას გულისხმობს იმ მშვიდობიანი აქციების წინააღმდეგ, რომელიც ბელარუსში ლუკაშენკოს მეექვსედ გაპრეზიდენტებას მოყვა.

პუტინთან სატელეფონო საუბრის შემდეგ ლუკაშენკომ თქვა:

"მქონდა გრძელი და არსებითი საუბარი რუსეთის პრეზიდენტთან... შევთანხმდით, რომ ჩვენი თავდაპირველი მოთხოვნის თანახმად, ბელარუსის უსაფრთხოების დასაცავად სრულ დახმარებას მივიღებთ. რაც შეეხება სამხედრო საკითხებს, ჩვენ რუსეთთან შეთანხმება გვაქვს, როგორც კოლექტიური უსაფრთხოების ხელშეკრულების ორგანიზაციის ნაწილს (CSTO). ხოლო ამგვარი სიტუაციები სწორედ ამ შეთანხმებას ემყარება", — განაცხადა ლუკაშენკომ.

ამ სატელეფონო საუბრის გამართვამდე ლუკაშენკო აცხადებდა, რომ ბელარუსს ჰყავდა ისეთი მთავრობა, რომელიც პრობლემას დამოუკიდებლად მოაგვარებდა. ამბობდა, რომ მათ უცხო ქვეყნის მთავრობა და შუამავალი არ სჭირდებოდათ.

პუტინთან საუბრის შემდეგ კი, ის თავისი მხარდამჭერების მიერ გამართულ მიტინგზე მივიდა და იმ წარმატებაზე ისაუბრა, რასაც ბელარუსი მთავრობამ საბჭოთა კავშირის დაშლის შემდეგ მიაღწია.

"თქვენ მე, სრულიად ახალგაზრდასა და გამოუცდელს, მთხოვეთ, მეხსნა ხალხი უფსკრულისგან. ჩვენ ეს გავაკეთეთ. ჩვენ გავაკეთეთ ის, რაზეც მილიონობით წინამორბედი ოცნებობდა. ჩვენ, პირველად ისტორიაში, ავაშენეთ დამოუკიდებელი და სუვერენული სახელმწიფო", — განაცხადა ლუკაშენკომ.

ბელარუსში საპროტესტო გამოსვლები საპრეზიდენტო არჩევნებს მოჰყვა. აქციები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ათასობით ადამიანი კი პოლიციამ დააკავა. საპროტესტო აქციების დროს ორი ადამიანი გარდაიცვალა.