ცოტა ხნის წინ, სოციალურ ქსელებში გავრცელდა ვიდეო, რომელიც თითქოსდა ამტკიცებდა, რომ საფრანგეთის პრეზიდენტი ემანუელ მაკრონი მატარებელში უკრაინაში გამგზავრებისას კოკაინის პაკეტს მალავდა. ვიდეოში ჩანს, როგორ იღებს მაკრონი ქაღალდს მაგიდიდან, რასაც ზოგიერთები კოკაინის პაკეტად აღიქვამენ.

ეს ინფორმაცია არასწორია და მიზანმიმართულად გავრცელდა პრორუსული და მემარჯვენე ექსტრემისტული ანგარიშების მიერ.

დეზინფორმაციის წყაროები:

ვიდეო თავდაპირველად გაავრცელეს ულტრა-მემარჯვენე აქტივისტებმა, მათ უადვილესად მიაწერეს მაკრონსა და გერმანიის კანცლერს, ფრიდრიხ მერცს, კოკაინის მოხმარება. მოგვიანებით ამავე სიცრუეს შეუერთდა რუსეთის საგარეო საქმეთა სამინისტროს წარმომადგენელი, მარია ზახაროვაც.

მარია ზახაროვამ, სოციალურ ქსელ Telegram-ზე გამოაქვეყნა პოსტი, სადაც ირონიულად მიუთითა, რომ საფრანგეთის პრეზიდენტი ემანუელ მაკრონი, გერმანიის კანცლერი ფრიდრიხ მერცი და დიდი ბრიტანეთის პრემიერ-მინისტრი, კეირ სტარმერი, შესაძლოა, კოკაინის მოხმარებაში იყვნენ ჩართული უკრაინაში ვიზიტის დროს.

"ევროპის ბედი გადაწყდება სრულიად დამოკიდებული პირების მიერ." — დაწერა ზახაროვამ და უკრაინის პრეზიდენტი ვოლოდიმირ ზელენსკი "კოკაინის არასტაბილურ მომხმარებლად" მოიხსენია. ასევე დაამატა, თითქოს დასავლეთის ერთ-ერთმა დიპლომატმა უთხრა, რომ ნარკოტიკების მოხმარება ევროპელ ლიდერებს შორის ჩვეულებრივი ამბავია.

ოფიციალური რეაქცია:

ელისეს სასახლემ ოფიციალურად უარყო ეს ბრალდება და განმარტა, რომ მაკრონის ხელში არსებული ნივთი ჩვეულებრივი ქაღალდის ხელსახოცია. რაც შეეხება მერცთან არსებულ პატარა თეთრ საგანს, ის ჩვეულებრივი ჩაის კოვზია ან ჩხირი – და არა "კოკაინის კოვზი", როგორც ამას პროპაგანდისტები ამტკიცებდნენ.

საფრანგეთის წამყვანმა მედიასაშუალებებმა, მათ შორის Libération-მა, დაადასტურეს, რომ ორივე შემთხვევა დეზინფორმაციის კლასიკური მაგალითია. საუბარია მანიპულაციურ კამპანიაზე, რომელიც მიზნად ისახავს დასავლელი ლიდერების დისკრედიტაციას.

პარალელები საქართველოსთან:

ეს შემთხვევა ნათლად აჩვენებს, როგორ მუშაობს რუსეთის მიერ მართული ან მასთან თანხვედრაში მოქმედი საინფორმაციო მანქანა. იგივე მეთოდოლოგია აქტიურად გამოიყენება საქართველოშიც — ვიდეოების კონტექსტიდან ამოგლეჯა, დასავლური ძალების დისკრედიტაცია, ფსევდოსკანდალების შექმნა და გადაუმოწმებელი ინფორმაციის ვირუსულად გავრცელება.

მაგალითად, ეს სიცრუე სწრაფად აიტაცეს საქართველოშიც და თითქოსდა სკანდალი გაავრცელეს, როგორც სახელისუფლებო პროპაგანდისტულმა მედიამ, ისე სხვადასხვა ფეისბუქმომხმარებლებმა:

საქართველოში უკვე არაერთხელ გვინახავს მსგავსი სქემა: ე.წ. სკანდალური სიუჟეტები, რომლებიც შემდეგ თვეების განმავლობაში დადასტურდება როგორც ყალბი, თუმცა ზიანი უკვე მიყენებულია. მაკრონის შემთხვევა მხოლოდ ერთია ამ გლობალური დეზინფორმაციული კამპანიის გრძელი ჯაჭვიდან.

სწორედ ამიტომ, უმჯობესია ყოველთვის გადავამოწმოთ ინფორმაცია. ამაში ჩვენი მომზადებული მასალებიც დაგეხმარებათ:

• შემდეგი პოდკასტი: დეზინფორმაციის ტექნოლოგიები — პროპაგანდა ციფრულ სამყაროში
• ქვიზი: როგორ არჩევ ტყუილ-მართალს?