ოცნების პარლამენტის პირველი ვიცე-სპიკერი, გია ვოლსკი საქართველოში გერმანიის ელჩის, პეტერ ფიშერის განცხადებას ეხმაურება იმის შესახებ, რომ "დიფ სთეითი" არ არსებობს.

"ზუსტად იცის თვითონ, რომ "დიფ სთეითიც" არსებობს და რასაკვირველია, არსებობს მართვის გარკვეული სისტემა, რომელშიც თვითონ ჩართულია ერთ-ერთ პატარა ჭანჭიკად. ის, რომ "დიფ სთეითი" არსებობს, თვითონ ამერიკის შეერთებული შტატების ახალი ადმინისტრაცია ადასტურებს. ეს ახალი მოვლენა არ არის, "დიფ სთეითი" წლების განმავლობაში არსებობს, მოქმედებს, თავისი ინტერესები აქვს და ეს საკვირველიც არ არის არავისთვის, გარდა იმ ხალხისა, ვისაც მიაჩნია, რომ მის მიმართ ამ "დიფ სთეითის" მოქმედება არის უსამართლო. საქართველო არის ამ უსამართლობის ერთ-ერთი სამიზნე. გერმანიის ელჩიც ლაპარაკობს სანქციებზე და ამ დროს, არათუ სანქციები, არამედ მილიარდობით დახმარებას უწევს სირიის ახალ ხელისუფლებას, მიუხედავად იმისა, რომ იცის, უამრავი სისხლი დაიღვარა სირიის ქუჩებში მას შემდეგ, რაც ეს ახალი ხელისუფლება მოვიდა სათავეში. უფრო მეტიც, გერმანიაში იწვევენ იმისთვის, რათა შობადობის პრობლემა იქნას დაძლეული. ეს უკვე ორმაგი სტანდარტი არ არის. ეს არის კონკრეტული პოლიტიკური გეგმა, რომელსაც გარკვეული მიზნები და ამოცანები აქვს", — განაცხადა ვოლსკიმ.

შეგახსენებთ, რომ გერმანიაში საქართველოს ელჩმა, პეტერ ფიშერმა ინტერპრესნიუსთან ინტერვიუში განაცხადა, რომ "დიფ სთეითი" "არ არსებობს" და "გამოგონილია".

"ჩვენ ნამდვილად არ ვართ "დიფ სთეითი". ეს არ არსებობს. ეს გამოგონილია და თუ ვინმეს შეუძლია "დიფ სთეითი" მაჩვენოს, მე ძალიან მაინტერესებს მისი ნახვა", — განაცხადა ელჩმა.