გერმანიის მთავრობის განცხადებით, თუ რუსეთი 12 მაისის დღის ბოლომდე არ დაიწყებს უკრაინაში 30-დღიანი ცეცხლის შეწყვეტის რეჟიმის დაცვას, ევროპული ქვეყნები რუსეთის წინააღმდეგ ახალი სანქციების მოსამზადებელ პროცესს დაიწყებენ.

"დრო გადის. დღის ბოლომდე კიდევ 12 საათია დარჩენილი და თუ ცეცხლის შეწყვეტა ძალაში არ შევა, ევროპული მხარე სანქციების მომზადებას დაიწყებს," — განაცხადა გერმანიის მთავრობის პრესსპიკერმა ბერლინში გამართულ პრესკონფერენციაზე.

10 მაისს, კიევში ჩავიდნენ დიდი ბრიტანეთის, საფრანგეთის, გერმანიისა და პოლონეთის ლიდერები, რომლებმაც განაცხადეს, რომ რუსეთმა 12 მაისიდან ცეცხლი უნდა შეწყვიტოს, რათა უზრუნველყოს სამშვიდობო პროცესის დაწყება. მათი განცხადებით, თუ რუსეთი ამ წინადადებას არ მიიღებს, მის წინააღმდეგ ახალ სანქციებს დააწესებენ და განაცხადეს, რომ აშშ-ის პრეზიდენტი დონალდ ტრამპი ამ პოზიციას ეთანხმებოდა.

"ლიდერები შეთანხმდნენ, რომ ცეცხლის შეწყვეტა უნდა გაგრძელდეს მინიმუმ 30 დღის განმავლობაში, რათა დიპლომატიისთვის სივრცე შეიქმნას. ამ პერიოდში დიპლომატიური ძალისხმევა უნდა იყოს მიმართული მშვიდობის უსაფრთხოების, პოლიტიკური და ჰუმანიტარული საფუძვლების შემუშავებაზე.

თუ რუსეთი უარს იტყვის სრულ და უპირობო ცეცხლის შეწყვეტაზე, უნდა დაწესდეს მკაცრი სანქციები მისი საბანკო და ენერგეტიკული სექტორების წინააღმდეგ, მათ შორის, წიაღისეულ საწვავზე, ნავთობსა და ე.წ. ჩრდილოვანი ფლოტზე.

ისინი შეთანხმდნენ, რომ დაამტკიცებენ ევროკავშირის მეთხუთმეტე სანქციების პაკეტს, რომელიც თანხვედრაში იქნება გაერთიანებული სამეფოს, ნორვეგიისა და აშშ-ს მიერ დაწესებულ სანქციებთან," — ნათქვამია ერთობლივ განცხადებაში.

შეგახსენებთ, უკრაინის პრეზიდენტმა ვოლოდიმირ ზელენსკიმ განაცხადა, რომ ის რუსეთისგან ცეცხლის შეწყვეტას ორშაბათიდან ელის და პირადად დაელოდება რუსეთის ლიდერს, ვლადიმერ პუტინს სტამბოლში 15 მაისს.

საპასუხოდ, პუტინმა განცხადება გააკეთა, რომელშიც უკრაინა დაადანაშაულა ცეცხლის შეწყვეტის შესახებ წინა შეთანხმებების დარღვევაში და არსებითად უარყო 30-დღიანი ზავის შეთანხმების მოთხოვნა. სამაგიეროდ, ვლადიმერ პუტინმა განაცხადა, რომ მზადაა კიევთან "პირდაპირი მოლაპარაკებებისთვის" ხუთშაბათს, 15 მაისს, სტამბოლში.