საქართველოს გენერალურმა პროკურატურამ 2018 წლის საპრეზიდენტო არჩევნების დროს ყალბი პირადობის მოწმობების დამზადების საქმის გამოძიება შეწყვიტა. უწყებაში ამბობენ, რომ საქმეზე გამოძიება სისხლის სამართლის კანონით გათვალისწინებული ქმედების არარსებობის გამო შეწყდა.

2018 წელს სამმა არასამთავრობო ორგანიზაციამ გაავრცელა ინფორმაცია, რომ სალომე ზურაბიშვილის სასარგებლოდ სავარაუდო გაყალბების მიზნით, სახელმწიფო სერვისების განვითარების სააგენტოს თავმჯდომარის ხელმძღვანელობით ყალბი პირადობები იბეჭდებოდა. პროკურატურამ საქმეზე გამოძიება დაიწყო.

როგორც უწყებაში განმარტავენ, მათ არასამთავრობო ორგანიზაციების წარმომადგენლები დაკითხეს, რომლებმაც განაცხადეს, რომ წყარომ მიაწოდა ინფორმაცია, რომლის თანახმად 2018 წლის 5-დან 10 ნოემბრის კვირაში, უწყების ერთ-ერთ შენობაში გაიმართა სპეციალური თათბირი სახელმწიფო სერვისების განვითარების სააგენტოს თავმჯდომარის უშუალო მონაწილეობით.

"გამოკითხულთა მტკიცებით, სწორედ თათბირზე გაიცა თითქოს დავალება, დამზადებულიყო ყალბი პირადობის მოწმობები. ასევე აცხადებდნენ, რომ ერთ ადამიანზე უნდა დაბეჭდილიყო ხუთი პირადობის მოწმობა, რომლებშიც სხვადასხვა სახელი, გვარი და პირადი ნომერი მიეთითებოდა, ხოლო ფოტოები ერთი პირის იქნებოდა. მათი ინფორმაციითვე, სახელმწიფო სერვისების განვითარების სააგენტოს, ცესკოსთვის უნდა მიეწოდებინა ამომრჩეველთა განახლებული სია, სადაც ასახული იქნებოდა ყალბი მონაცემები", — ნათქვამია პროკურატურის განცხადებაში.

უწყებაში აცხადებენ, რომ 5 ნოემბრიდან 10 ნოემბრამდე სერვისების განვითარების სააგენტოს თავმჯდომარე მივლინებით ინდონეზიაში იყო, რაც საზღვრის კვეთით დასტურდება. ამასთან, თათბირში მონაწილეობა უარყვეს თვითონ სააგენტოს თავმჯდომარემ, ამავე სამსახურის აუდიტის სამსახურის უფროსმა და სააგენტოს სხვა თანამშრომლებმა.

"საგამოძიებო ექსპერიმენტის ფარგლებში, შესაბამისი კომპიუტერული ტექნიკისა და პროგრამული უზრუნველყოფის გამოყენებით, იდენტიფიცირებულ ბაზებში არსებული მოქალაქეთა პერსონალური მონაცემები და ბიომეტრიული ფოტოსურათები ელექტრონულად, ფოტოსურათების უნიკალური პარამეტრების, ე.წ. ჰეშების დონეზე შედარდა ერთმანეთს. სია შედგებოდა 3 558 437 მოქალაქის მონაცემისგან. აღსანიშნავია, რომ თითოეული მოქალაქის პერსონალურ მონაცემს და ბიომეტრიულ ფოტოსურათს, როგორც ელექტრონულად არსებულ ფაილს, პროგრამულად გააჩნიათ საკუთარი უნიკალური იდენტიფიკატორები, ე.წ. ჰეშ კოდები, რომლებიც არ მეორდება, ისევე როგორც არ შეიძლება გამეორდეს ადამიანის თითის ანაბეჭდი. ასევე პროგრამულად გამოირიცხა ერთი და იგივე პირის ფოტოსურათის მრავალჯერ გამოყენება სხვადასხვა სახელსა და გვარზე", — განმარტავენ პროკურატურაში.

არასამთავრობო ორგანიზაციის წარმომადგენლები ასევე აცხადებდნენ, რომ სავარაუდოდ წალენჯიხასა და გარდაბანში მზადდებოდა ყალბი არაელექტრონული, ძველი პირადობის მოწმობები. საგამოძიებო ორგანოში ამბობენ, რომ ამ პერიოდში წალენჯიხასა და გარდაბანში ელექტრონული პირადობის მოწმობა არ გაცემულა.