საგარეო საქმეთა საიმინისტროს ინფორმაციით, ბოლო ერთი კვირის განმავლობაში საოკუპაციო ძალებმა საქართველოს 12 სოფელში უკანონო ბორდერიზაციის პროცესი დაიწყეს. ამ თემაზე განცხადება უწყებამ გაავრცელა.

განცხადებაში აღნიშნულია, რომ მაშინ, როცა მთელი მსოფლიო კორონავირუსის პანდემიას ებრძვის, რუსეთის საოკუპაციო ძალები ააქტიურებენ მავთულხლართების, ე.წ. საზღვრის აღმნიშვნელო ბანერებისა და ე.წ. ცეცხლსაწინააღმდეგო ხნულების გავლებას ორივე ოკუპირებული ტერიტორიის — აფხაზეთისა და ცხინვალის რეგიონების მიმართულებით.

"მხოლოდ ბოლო ერთი კვირის განმავლობაში ე.წ. ბორდერიზაციის პროცესი პარალელურად მიმდინარეობდა ქარელის მუნიციპალიტეტის სოფლების — ცერონისისა და კნოლევის, ტახტისძირისა და დვანის, კოდასა და ჭვრინისის, ატოცის; წალენჯიხის მუნიციპალიტეტის სოფლების — ფახულანისა და მუჟავას, აგრეთვე ზუგდიდის მუნიციპალიტეტის სოფლების — ხურჩისა და განმუხურის მიმდებარე ტერიტორიებზე", — წერია უწყების განცხადებაში.

გარდა ზემოთ ჩამოთვლილი სოფლებისა, გუშინ, 21 მაისს რუსეთის საოკუპაციო რეჟიმმა უკანონო ბორდერიზაციის პროცესი დაიწყო გორის რაიონის სოფელ მერეთში.

განცხადებაში წერია, რომ ამ ყველაფერთან ერთად რუსეთი გამუდმებით თავს ესხმის ლუგარის ლაბორატორიას და გააქტიურებული აქვს პროპაგანდისტული მითების შეთხზვა.

საგარეო საქმეთა სამინისტრო მიმართავს საერთაშორისო თანამეგობრობას, რომ სათანადო შეფასება მისცეს რუსეთის დესტრუქციულ ნაბიჯებს და ქმედითი ზომები მიიღოს საქართველოს წინააღმდეგ რუსეთის გახშირებული თავდასხმების შესაჩერებლად.