პრემიერ-მინისტრის გიორგი გახარიას თქმით, თუ დამატებითი თანხების მოძიება გახდება საჭირო მთავრობა მიმართავს ყველას, პირველ რიგში კი ქართუ ფონდს. დღეს, 13 მარტს პრემიერ-მინისტრმა, გიორგი გახარიამ ეკონომიკური სტიმულირების გეგმა გუნდთან ერთად წარადგინა.

"ის რესურსი, რომელიც ჩვენ ვთქვით, ის სრულად უკვე დათვლილია და მობილიზებულია სახელმწიფოს მხრიდან ჩვენ თუ დაგვჭირდა დამატებით რესურსები, რა თქმა უნდა, მივმართავ ყველას და პირველ რიგში, ქართუ ფონდს, ვინც მსგავსი დახმარებისთვის მზაობას გამოავლენს", — თქვა გიორგი გახარიამ.

პრემიერმა აღნიშნა, რომ კორონავირუსის გამო საგანგებო მდგომარეობის გამოცხადება არ იგეგმება, თუმცა ქვეყანამ საჭირო ზომას იღებს.

ფონი ქართუს განცხადება დღეს, 13 მარტს მმართველმა პარტიამ გაავრცელა. ფონდი აცხადებს, რომ კორონავირუსის გავრცელებასთან ბრძოლაში მზადაა, საჭიროების და დანაკლისის შემთხვევაში სახელმწიფოს ფინანსურად დაეხმაროს.

12 მარტის მთავრობის სხდომაზე პრემიერ-მინისტრმა ეკონომიკურ გუნდს დაავალა კორონავირუსის გამოწვევების ფონზე შეიმუშავონ "ეკონიომიკური სტიმულირების გეგმა". გიორგი გახარიას განცხადებით, ყველაფერი უნდა გაკეთდეს იმისთვის, რომ ეფექტურად უპასუხონ გამოწვევებს.

დღევანდელ, 13 მარტის ბრიფინგზე პრემიერმა გუნდთან ერთად ეკონომიკური სტიმულირების გეგმა წარადგინა. მან აღნიშნა, რომ სახელმწიფო აქამდე დაგეგმილი 600 მილიონი დღგ-ს ნაცვლად, ეკონომიკას და კომპანიებს დაუბრუნებს დამატებით 600 მილიონს, "რაც დღგ-ს საშუალებით ერთი წლის განმავლობაში ეკონომიკას დაუბრუნებს მილიარდ ორასი მილიონის ფინანსურ რესურსს".

პრემიერის განცხადებით, ეკონომიკური სტიმულირებისთვის მილიარდი ლარია მობილიზებული. ამასთანავე ინფრასტრუქტურული პროექტებისთვის სახელმწიფო წლის ბოლომდე დამატებით 300 მილიონ ლარს მიმართავს. მისივე თქმით, თუ საჭირო გახდა დახმარებისთვის მიმართავენ ყველას, პირველ რიგში, კი ქართუ ფონდს.

გახარიას განმარტებით, მიიღეს გადაწყვეტილება, რომ ტურიზმის სექტორის დარგში კომპანიებს 4 თვით გადაუვადებენ ქონებისა და საშემოსავლო გადასახადს. ასევე, 4 ნომრიდან 50 ნომრამდე სასტუმროებისთვის საპროცენტო მომსახურებას სახელმწიფო დაფარავს. მისივე თქმით, ობიექტური საჭიროების შემთხვევაში კერძო კომპანიებს ბანკები სესხის რესტრუქტურიზაციით უზრუნველყოფენ.

ამავე პროგრამის ფარგლებში, პრემიერის თქმით, საბანკო სექტორთან ერთად მიიღეს გადაწყვეტილება, რომ ფიზიკური პირები 3 თვის განმავლობაში, აუცილებლობის შემთხვევაში, გათავისუფლებული იქნებიან სასესხო ვალდებულებებისგან.

პრემიერმა ისაუბრა იმაზეც, რომ ლარის კურსის ვარდნაზე გავლენა იქონია პანდემიასთან დაკავშირებულმა გამოწვევებმა. მისი თქმით, ეკონომიკური გუნდი მუშაობს ამ საკითხზე და დარწმუნებული არის, რომ ლარის კურსი შესაბამის საბალანსო ნიშნულს დაუბრუნდება.

11 მარტს ჯანდაცვის მსოფლიო ორგანიზაციამ COVID-19, იგივე კორონავირუსი, რომელმაც გავრცელება 3 თვის წინ დაიწყო, საერთაშორისო პანდემიად გამოაცხადა. საქართველოში კორონავირუსით ინფიცირების 25 შემთხვევაა დადასტურებული.