ცნობილი ისლანდიური ინდი-ფოლკ ჯგუფი Of Monsters And Men მალე ახალ, რიგით მეოთხე სტუდიურ ალბომს გამოუშვებს. ალბომი, სახელწოდებით All Is Love And Pain In The Mouse Parade ("თაგვების აღლუმში მხოლოდ სიყვარული და ტკივილია"), 13 სიმღერას აერთიანებს და 17 ოქტომბერს გამოვა. მანამდე, უკვე შეგვიძლია, ალბომიდან ორი სინგლი მოვისმინოთ: Television Love ("ტელევიზიის სიყვარული"), რომელიც 1-ელ ივლისს გამოვიდა და Ordinary Creature ("ჩვეულებრივი არსება"), რომელიც ჯგუფმა სულ ახლახან, ალბომის ანონსთან ერთად გაავრცელა.

პრესრელიზში ვკითხულობთ, რომ ახალი ალბომი, რომლის შთაგონების წყაროც თავად ბენდის წევრების პირადი ცხოვრება გახდა, ასახავს ადამიანის ღრმა შინაგან სამყაროს და განცდების სპექტრს: სიხარულიდან სევდამდე, სიყვარულიდან ტკივილამდე. რაც შეეხება ახალ სინგლს Ordinary Creature, ის "ცხოვრების ტკბილ-მწარე ბუნების" და იმ ადამიანის მოლოდინის შესახებაა, რომელიც შვებას მოგგვრის.

"ეს სიმღერა არის იმ მომენტზე, როცა დიდი ხნის განმავლობაში ცუდად ყოფნის შემდეგ თავს უკეთესად გრძნობ, საკუთარ თავს უბრუნდები და გახსენდება, რას ნიშნავს ჩვეულებრივ არსებად ყოფნა", — ვკითხულობთ ბენდის განცხადებაში.

Of Monsters and Men ("ურჩხულებსა და ადამიანებზე") 2010 წელს შეიქმნა ისლანდიაში, სადაც ბენდების ყოველწლიური კონკურსის გამარჯვებული გახდა. მომდევნო წელს ჯგუფმა სადებიუტო ალბომი My Head Is an Animal გამოუშვა, რომელიც არაერთი ქვეყნის ჩარტების სათავეში მოექცა. განსაკუთრებული კომერციული წარმატება ხვდა წილად ალბომის მთავარ სინგლს, Little Talks, რომელიც მილიონობით ასლად გაიყიდა და სხვადასხვა ქვეყანაში პლატინისა და ოქროს რამდენიმე სტატუსი დაიმსახურა. სიმღერას სპოტიფაიზე 1,2 მილიარდზე მეტი სტრიმი აქვს.

Of Monsters and Men-ს ასევე გამოშვებული აქვს ალბომები Beneath the Skin (2015) და Fever Dream (2019).

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...