პრემიერ-მინისტრის, გიორგი გახარიას განცხადებით, ყველა კერძო კომპანიას, საჭიროების შემთხვევაში, უახლოესი 3-4 თვის განმავლობაში, ბანკები სესხის რესტრუქტურიზაციას გაუკეთებენ. ამის შესახებ გახარიამ ეკონომიკური სტიმულირების გეგმის წარდგენისას ისაუბრა.

"ყველა კერძო კომპანიას, რომელსაც ამის ობიექტური საჭიროება ექნება, საბანკო სექტორი გარანტირებულად უზრუნველყოფს სესხების რესტრუქტურიზაციით უახლოესი 3-4 თვის განმავლობში. ამ საშუალებით მხოლოდ ტურიზმის სექტორში ჩვენ დავტოვებთ დაახლოებით 100 მილიონი ლარის ფინანსურ რესურს", — განაცხადა მან.

პრემიერის განცხადებით, ეკონომიკური სტიმულირებისთვის მილიარდი ლარია მობილიზებული. ამასთანავე ინფრასტრუქტურული პროექტებისთვის სახელმწიფო წლის ბოლომდე დამატებით 300 მილიონ ლარს მიმართავს. მისივე თქმით, თუ საჭირო გახდა დახმარებისთვის მიმართავენ ყველას, პირველ რიგში, კი ქართუ ფონდს.

ეკონომიკური სტიმულირების გეგმის ფარგლებში კი, დაგეგმილი, რომ ისეთ დარგებში და ისეთი კომპანიებისთვის, რომლებიც საქმიანობენ სასტუმროებისა და რესტორნების, ტურისტული სააგენტოების, სატრანსპორტო კომპანიების, საექსკურსიო კომპანიებისა და სხვა სფეროებში 4 თვით გადაუვადებენ ქონებისა და საშემოსავლო გადასახადს. მისივე თქმით, 4 ნომრიდან 50 ნომრამდე სასტუმროებისთვის საპროცენტო მომსახურებას სახელმწიფო დაფარავს. პრემიერის თქმით, ეს შეეხება დაახლოებით 2000 სასტუმროს.

ამავე პროგრამის ფარგლებში, პრემიერის თქმით, საბანკო სექტორთან ერთად მიიღეს გადაწყვეტილება, რომ ფიზიკური პირები 3 თვის განმავლობაში, აუცილებლობის შემთხვევაში, გათავისუფლებული იქნებიან სასესხო ვალდებულებებისგან.

პრემიერმა ისაუბრა იმაზეც, რომ ლარის კურსის ვარდნაზე გავლენა იქონია პანდემიასთან დაკავშირებულმა გამოწვევებმა. მისი თქმით, ეკონომიკური გუნდი მუშაობს ამ საკითხზე და დარწმუნებული არის, რომ ლარის კურსი შესაბამის საბალანსო ნიშნულს დაუბრუნდება.

11 მარტს ჯანდაცვის მსოფლიო ორგანიზაციამ COVID-19, იგივე კორონავირუსი, რომელმაც გავრცელება 3 თვის წინ დაიწყო, საერთაშორისო პანდემიად გამოაცხადა. საქართველოში კორონავირუსით ინფიცირების 25 შემთხვევაა დადასტურებული.