დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

ამ ეტაპზე საქართველოში კორონავირუსით ინფიცირების 9 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს. რა თქმა უნდა, მსგავსი შემთხვევების შესახებ ინფორმაციის გავრცელებისას პირველ რიგში ყველას ის გვაინტერესებს, ვისთან ჰქონდათ შეხება კორონავირუსით ინფიცირებულ ადამიანებს. სწორედ ეს წარმოადგენს დაავადებათა კონტროლის ცენტრის ერთ-ერთ უმთავრეს ამოცანასაც: გამოარკვიოს და მოიძიოს ის ადამიანები, რომელთაც ინფიცირებულ პაციენტთან თუნდაც 15-წუთიანი შეხება ჰქონდათ.

ვინ არიან "კონტაქტები"

პირები (სამედიცინო პერსონალის ჩათვლით) რომელთაც COVID-19-ის საეჭვო პაციენტებთან შეხება ჰქონდათ, კონტაქტებად ითვლებიან. მიზანშეწონილია, რომ მათ ჯანმრთელობაზე დაკვირვება 14 დღის განმავლობაში მოხდეს.

კონტაქტად ითვლება ადამიანი, რომელსაც ჩამოთვლილთაგან ნებისმიერი სახის კავშირი ჰქონდა დაავადებულთან:

  • ჯანმრთელობის დაცვასთან ასოცირებული კონტაქტი, რომელიც მოიცავს დაავადებულისთვის პირდაპირი სამედიცინო დახმარების გაწევას, მუშაობას იმ სამედიცინო პერსონალთან, რომელიც ვირუსის მატარებელია, პაციენტების ვიზიტორები და ადამიანები, რომლებიც იმყოფებოდნენ იმავე გარემოში, სადაც დაავადებული იმყოფებოდა;
  • ადამიანები, რომლებიც პაციენტთან ერთად საკლასო ოთახში სწავლობდნენ ან ახლო პერიმეტრზე მუშაობდნენ;
  • ადამიანები, რომლებიც პაციენტთან ერთად მგზავრობდნენ ნებისმიერი სატრანსპორტო საშუალებით;
  • სიმპტომების გამოჩენამდე 14 დღის განმავლობაში დაავადებულ ადამიანთან ერთად მცხოვრები პირები.

თუ ეჭვობთ, რომ შეიძლება თქვენ იყოთ "კონტაქტი", დაუკავშირდით დაავადებათა კონტროლის ცენტრის ან ჯანდაცვის სამინისტროს ცხელ ხაზს.

გაეცანით ჯანდაცვის სამინისტროს რეკომენდაციებსა და პროტოკოლს თვითიზოლაციისთვის

სიმპტომების გაჩენის შემთხვევაში:

ფოტო: CDC

  • თავად ნუ გადაწყვეტთ, რა ტრანსპორტით და როგორ უნდა გამოცხადდეთ საავადმყოფოში. გაითვალისწინეთ სამედიცინო პერსონალის რჩევები;
  • ჯანდაცვის დაწესებულებამდე მგზავრობისას აუცილებლად ატარეთ სამედიცინო ნიღაბი;
  • არ იმგზავროთ საზოგადოებრივი ტრანსპორტით: გამოიძახეთ სასწრაფოს ბრიგადა;
  • თუ თქვენი ავტომობილით წახვალთ საავადმყოფოში, ყველა ფანჯარა ჩაწეული უნდა გქონდეთ;
  • დაიცავით რესპირატორული და ხელის ჰიგიენა;
  • დაიცავით მინიმუმ ერთმეტრიანი დისტანცია სხვა ადამიანებისაგან.

გაითვალისწინეთ, რომ ნებისმიერი ზედაპირი, რომელზეც ბიოლოგიურ კვალს დატოვებთ, სტერილიზებას საჭიროებს.

წაიკითხეთ NCDC-ისა და WHO-ს რეკომენდაციები კორონავირუსის პრევენციის შესახებ:

ამავე თემაზე: