ნაციონალური მოძრაობის წევრის, სალომე სამადაშვილის თქმით, ევროპარლამენტარებისთვის ქართული ოცნების მიერ შეთავაზებული შემსწავლელი კომისია ევროპარლამენტში ინსტიტუციურად არ არსებობს. აქედან გამომდინარე, საქართველოს პარლამენტის დეპუტატი ფიქრობს, რომ მსგავსი ჯგუფი არ შეიქმნება.

"ირაკლი კობახიძესა და ქართულ ოცნებას, როგორც ჩანს, მართლმსაჯულების სისტემა ერევა საზოგადოებასთან ურთიერთობის საქმეში და ჰგონიათ, რომ შესთავაზებენ ევროპარლამენტს რაღაც ჯგუფის შექმნას, რომელიც დარწმუნებული ვარ, რომ არ შეიქმნება, რადგან ასეთი ფორმატი ინსტიტუციურადაც არ არსებობს ევროპარლამენტში. ამასობაში გავა ძალიან ბევრი დრო და ისინი შექმნიან ილუზიას, რომ ქართულ ოცნებას რაღაც პოზიცია აქვს გახსნილობის", — აღნიშნა სამადაშვილმა.

ქართული ოცნება ევროპარლამენტარებს სთავაზობს, უგულავას საქმეზე შეიქმნას ფაქტების შემსწავლელი კომისია. ქართული ოცნების დეპუტატმა, ირაკლი კობახიძემ თქვა, რომ ევროპარლამენტარები საქართველოში უნდა ჩამოვიდნენ და შეისწავლონ თბილისის ყოფილი მერის საქმე.

გიგი უგულავას დაკავებასთან დაკავშირებით შეშფოთება გამოთქვეს როგორც ევროპარლამენტარებმა, ასევე ამერიკელმა კონგრესმენებმა. გარდა ამისა, პოლიტიკოსის დაკავებაზე შეშფოთება გამოთქვეს შვედეთის, ესტონეთის და ლიეტუვის საგარეო საქმეთა მინისტრებმა.

უგულავას დაკავება და შეწყვეტილი დიალოგი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".