ევროპის საბჭოს საპარლამენტო ასამბლეაში ლიეტუვის დეპუტატის შეკითხვაზე პასუხისას საგარეო საქმეთა მინისტრმა, დავით ზალკალიანმა ოკუპაციაზე ისაუბრა. საგარეო საქმეთა სამინისტროს ცნობით, დავით ზალკალიანმა ქართველი ექიმის, ვაჟა გაფრინდაშვილის საქმეც ახსენა და აღნიშნა, რომ კვლავ გრძელდება მავთულხლართებისა და ხელოვნური ბარიერების დამონტაჟება.

"ოკუპირებულ ტერიტორიებზე ვითარება გაუარესდა, სამწუხაროდ, ფაქტობრივი ანექსიისა და ოკუპაციის პროცესი გრძელდება... ახლაც კი როდესაც ჩვენ ვსაუბრობთ, ეს პროცესი გრძელდება. ასევე, მინდა, გავიხსენო გატაცებისა და უკანონო დაკავების შემთხვევა, როდესაც ექიმი, რომელიც საოკუპაციო ხაზთან პაციენტს სტუმრობდა, დააკავეს, რაც შემაძრწუნებელი ფაქტი იყო", — განაცხადა დავით ზალკალიანმა ევროსაბჭოში.

მინისტრის თქმით, აუცილებელია გაძლიერდეს ზეწოლა იმ ძალაზე, რომელიც ოკუპირებული ტერიტორიების ეფექტურ კონტროლს ახორციელებს.

28 იანვარს საქართველოს პრეზიდენტი, სალომე ზურაბიშვილი საპარლამენტო ასამბლეის სესიას სიტყვით მიმართავს. უწყების ინფორმაციით, პრეზიდენტი ისაუბრებს საქართველოში მიმდინარე მოვლენებზე და საქართველოს ოკუპირებულ ტერიტორიებზე ადამიანის უფლებათა დაცვის კუთხით არსებულ სიტუაციაზე.