ხვალ, პირველ სექტემბერს, დღის მეორე ნახევარში უმრავლესობის სხდომა იმართება. ამის შესახებ ინფორმაცია On.ge-ს პარტიის პრესსამსახურიდან მიაწოდეს.

სავარაუდო განსახილველი საკითხი მოქმედი პრემიერის, მამუკა ბახტაძის ჩანაცვლებაა. როგორც TV პირველი იუწყება, ამ თანამდებობაზე ინფრასტრუქტურის მინისტრი, მაია ცქიტიშვილი და შინაგან საქმეთა მინისტრი გიორგი გახარია განიხილებიან.

საპარლამენტო უმრავლესობის წევრმა, თამარ ხულორდავამ ხვალინდელ შეხვედრას "ძალიან მნიშვნელოვანი" უწოდა:

"ხვალ არის ძალიან მნიშვნელოვანი სხდომა დაგეგმილი. ხვალ კიდევ უნდა შევჯერდეთ გარკვეულ საკითხებზე და ამის შემდეგ გავაკეთებთ კომენტარს იმასთან დაკავშირებით, თუ კონკრეტულად რა სახის ცვლილებები არის დაგეგმილი... [ვიხილავთ თუ არა ბახტაძის ნაცვლად გახარიას] ამაზე ჩემი კომენტარი უკვე გითხარით".

რამდენიმე კვირის წინ, 16 აგვისტოს მოქმედმა პრემიერმა, მამუკა ბახტაძემ ამ საკითხზე დასმულ კითხვაზე პასუხის გაცემის დროს თქვა, რომ გუნდის დაკომპლექტება დამოკიდებული იქნება მომავალ პროგრამაზე.