რუსთავი 2-ის საინფორმაციო სამსახურის ყოფილმა ხელმძღვანელმა, ნოდარ მელაძემ დაადასტურა, რომ ამავე არხის ყოფილი გენერალური დირექტორის, ნიკა გვარამიას ახალ არხზე გადასვლას გეგმავს.

"შევხვდებით იქ, სადაც ხდება მთავარი და მთავარი მოხდება იქ, სადაც მუშაობენ ამ ქვეყნის მთავარი ჟურნალისტები", — ასე უპასუხა მელაძემ კითხვას სამომავლო გეგმებზე, რა დროსაც მას გვარამიამ ჰკითხა, თუ რა ერქვა ამ არხს. "მთავარი", — უპასუხა მელაძემ. ამის შესახებ მან გადაცემა #სირცხვილიას ეთერში ისაუბრა.

მანვე აღნიშნა, რომ დანარჩენ დეტალებზე არ ისაუბრებდა. ცნობილია, რომ გვარამიას ახალ მაუწყებელს მთავარი არხი ერქმევა. ამავე არხზე დაიწყებს მუშაობას რუსთავი 2-დან გათავისუფლებული ტელეწამყვანი ნანუკა ჟორჟოლიანიც.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს გიორგი ლაფერაშვილს; პოლიტიკური გადაცემების წამყვანებს გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

პროტესტის ნიშნად არხი დატოვეს კურიერის წამყვანებმა, დიანა ჯოჯუამ, პაატა იაკობაშვილმა და მიშა სესიაშვილმა.