რუსეთის დუმის წევრმა, სერგეი გავრილოვმა, რომლის საქართველოში ვიზიტს მრავალდღიანი აქციები მოჰყვა, Новая Газета-სთან ინტერვიუში განაცხადა, რომ თბილისში ჩამოსვლამდე კურთხევა რუსეთს პატრიარქისგან მიიღო.

ჟურნალისტმა გავრილოვს ჰკითხა, როგორ ათავსებს ის კომუნისტურ ფრაქციაში მოღვაწეობასა და მართლმადიდებლური ასამბლეის ხელმძღვანელობას:

— კომუნისტურ ფრაქციაში თავს კარგად ვგრძნობ: ერთი შემთხვევაც არ ყოფილა, როცა პარტიაში პრობლემა შემქმნია. პარტიას რელიგიასთან დელიკატური დამოკიდებულება აქვს. სხვათა შორის, საქართველოში ვიზიტამდე პატრიარქ კირილეს ვეწვიე და მას რჩევა ვკითხე. მან მე დამლოცა და თქვა, რომ აუცილებელია, ურთიერთობის გაუმჯობესება საქართველოსთან. როცა დუმაში მივედი, სხვა სასულიერო პირებსაც დავეკითხე, მათ შორის, მიტროპოლიტ ტიხონს. კომუნისტურ ფრაქციაში მორწმუნეებისა და ეკლესიური ადამიანების რაოდენობა დაახლოებით იმდენივეა პროპორციულად, რამდენიც სხვა ნებისმიერ ფრაქციაში.

ჟურნალისტმა გავრილოვს ასევე ჰკითხა, რა დამოკიდებულება აქვს სტალინთან:

"თავშეკავებული, თუმცა ვფიქრობ, რომ უკეთესად უნდა შევისწავლოთ მისი მემკვიდრეობა - განსაკუთრებით ომის შემდგომი პერიოდი, როცა ის თანაუგრძნობდა ავტოკეფალური ეკლესიების შექმნას"

20 ივნისის აქცია

მოქალაქეების პროტესტი საქართველოში სწორედ გავრილოვის და სხვა რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.

აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი.

შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა. საქმეზე გამოძიება სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს.

ამავე თემაზე: