რადიო თავისუფლების ევროპის ბიუროს რედაქტორის, რიკარდ იოზვიაკის X-ზე წერს, რომ 8 მაისს ვარშავაში, ევროკავშირის საგარეო საქმეთა საბჭოს არაფორმალური სხდომაზე, საქართველოს გარდა გაერთიანების წევრობის ყველა კანდიდატი სახელმწიფო მიიწვიეს.

"საინტერესოა, რომ საქართველო არ არის მიწვეული პოლონეთში, ვარშავაში გამართულ ევროკავშირის არაფორმალურ საგარეო საქმეთა საბჭოს სხდომაზე. მიწვეულია ევროკავშირის ყველა სხვა კანდიდატი ქვეყანა", — წერს იოზვიაკი.

ოცნების ხელისუფლების საგარეო საქმეთა მინისტრმა, მაკა ბოჭორიშვილმა ჟურნალისტის კითხვაზე, რატომ არ იმყოფება პოლონეთში ევროკავშირის საგარეო საქმეთა საბჭოს არაფორმალური სხდომაზე? — განაცხადა, რომ ამის მიზეზი ევროკავშირის ორმაგი სტანდარტია.

"პოლონეთს კითხეთ. ის პასუხი მაქვს, რომ ორმაგი სტანდარტით ხდება მიდგომა ყველგან. საქართველოში არ არის არავისზე ნაკლები დემოკრატია, არანაირი დემოკრატიული უკუსვლა. მთელ ევროპაში ასე უცებ ვერ გავასწორებთ ორმაგ სტანდარტს. ეშველება ყველაფერს. ის არის ორმაგი სტანდარტი, რაც არის დასაშვები საფრანგეთში, რაც არის დასაშვები გერმანიაში, რომ შფოთდებიან საქართველოში, ეს არის ორმაგი სტანდარტი", — განაცხადა მაკა ბოჭორიშვილმა ტელეკომპანია "პირველის" ეთერში.

ტელეკომპანია "ფორმულას" კითხვაზე "რატომ არ იყო საქართველო სხდომაზე მიწვეული", პოლონეთის საგარეო საქმეთა სამინისტროში განაცხადეს, რომ ეს გადაწყვეტილება გამოწვეულია ქართული ოცნების ხელისუფლების ნაბიჯით, შეაჩეროს ევროინტეგრაციის პროცესი.

"რა თქმა უნდა ვწუხვართ, რომ ვარშავაში ჩვენს არაფორმალურ შეხვედრაში საქართველოს წარმომადგენლები არ მონაწილეობენ. თუმცა, ეს გამოწვეულია მხოლოდ საქართველოს ხელისუფლების მიერ მიღებული პირადი გადაწყვეტილებით, რომელმაც გასული წლის ნოემბერში შეაჩერა ევროკავშირში ინტეგრაციის პროცესი. გამოვთქვამთ შეშფოთებას საქართველოს ხელისუფლების მიერ საკუთარი საზოგადოების წინააღმდეგ განხორციელებულ ქმედებებთან დაკავშირებით. მაგრამ, ჩვენ ვაგრძელებთ ქართველი ერის გვერდით მტკიცედ დგომას. მზად ვართ მხარი დავუჭიროთ მის ბრძოლას დემოკრატიისა და ღირებულებებისთვის, რომლებიც შეესაბამება ევროპულ საზოგადოება" — უთხრეს "ფორმულას" პოლონეთის საგარეო საქმეთა სამინისტროში.