ესტონეთის ქალაქ ნარვაში, რომელსაც რუსეთისგან მხოლოდ ერთი ხიდი აშორებს, 9 მაისს "პუტლერის" ბანერი გამოფინეს.

ნარვას მუზეუმმა ჰერმანის ციხესიმაგრეზე, რომელიც რუსეთის მხარეს გაჰყურებს, ვლადიმერ პუტინისა და ადოლფ ჰიტლერის სახეებით შეერთებული გამოსახულება გამოფინა წარწერით "პუტლერი — ომის კრიმინალი". ბანერი ნარვას მდინარის გადაღმა, რუსეთის მხრიდანაც ჩანს.

ფოტო: Karmen Joller/ X

აღსანიშნავია, რომ ამ ციხესიმაგრეზე მუზეუმის ადმინისტრაციას 2023 წლიდან ჰქონდა გამოფენილი ბანერი, რომელზეც პუტინს ომის კრიმინალს უწოდებდა, ფაშიზმზე გამარჯვების დღესთან, 9 მაისთან დაკავშირებით კი, რომელსაც პუტინი მოსკოვში პომპეზურად აღნიშნავს, ის პირდაპირ ჰიტლერს შეადარეს.

ჰერმანის ციხესიმაგრე 2023 წელს

ჰერმანის ციხესიმაგრე 2023 წელს

ფოტო: Dmitri Fedotkin/ERR

ჰიტლერი ათწლეულების განმავლობაში ბოროტების მთავარ სიმბოლოდ იქცა საბჭოთა რეჟიმის და მოგვიანებით — პუტინის რეჟიმის იდეოლოგიურ მესიჯებში.

ნარვას მუზეუმის დირექტორმა, მარია სმორჟევსკიხ-სმირნოვამ, განაცხადა, რომ ბანერი ყოველ წელს იმის შესახსენებლად იფინება, რომ რუსეთი სრულმასშტაბიან ომს აწარმოებს და სამხედრო დანაშაულებს სჩადის.

"დღეს, ევროპის დღეს, ვზეიმობთ მშვიდობასა და თავისუფლებას. მეორე მსოფლიო ომის დასრულების შემდეგ სწორედ მშვიდობა და თავისუფლება, სუვერენიტეტის პატივისცემა და სოლიდარობის პრინციპები გახდა ევროპის ერთობის საფუძველი. ამავდროულად, უკვე მეოთხე წელია, ჩვენს გვერდით სრულმასშტაბიანი ომი მიმდინარეობს, რომელიც პუტინმა დაიწყო. დიქტატორს დიქტატორად მოვიხსენიებთ, ხოლო ომის დანაშაულებს — ომის დანაშაულებად," — უთხრა მან გამოცემა ERR-ის რუსულენოვან პორტალს.