საქართველოს საპატრიარქო სამეფო უბნის თეატრში რეჟისორ დათა თავაძის მიერ დადგმულ სპექტაკლ "ლიბერტეს" ეხმაურება და მას "ღვთისმგმობელს" და "მკრეხელობას" უწოდებს. მათ მიერ გავრცელებულ განცხადებაში ნათქვამია, რომ "ამგვარი მკრეხელობის ჩამდენი, შეუნანებლობის შემთხვევაში, ეკლესიიდან განკვეთას ექვემდებარება".

"ჭეშმარიტი ხელოვნება სიკეთის მსახურება და ამ სიკეთის ხალხისთვის გაზიარებაა. სწორედ ეს არის მისი არსი და დანიშნულება, მაგრამ, როცა შემოქმედება იქცევა სხვათა დამცირებისა და შეურაცხყოფის იარაღად, თესავს ღვარძლს, სიძულვილს და სიბილწეს, იწვევს საზოგადოების გაღიზიანებას და დაპირისპირებას, მაშინ ის უკვე მიზანმიმართული ბოროტებაა და არაფერი აქვს საერთო ნამდვილ ხელოვნებასთან.

როგორც წმინდა ბასილი დიდი ბრძანებს, თავისუფლება არ ნიშნავს იმის კეთებას, რაც გინდა, თავისუფლება ნიშნავს, აკეთო ის, რაც საჭიროა.

მოვუწოდებთ ყველას, პატივი სცეს და გაიაზროს პასუხისმგებლობა იმ სულიერი ფესვებისადმი, რომლებიც ადამიანის სულის განუყოფელი ნაწილია. თავის მხრივ, რა თქმა უნდა, საზოგადოების მოვალეობაა, მართებულად შეაფასოს, რომ ამგვარი ქმედება არ უნდა შეინიღბოს თავისუფლებისა და ხელოვნების სახელით, არ უნდა იქცეს ღვთის გმობის, რწმენის, ზნეობისა და ისტორიული მეხსიერების დაცინვის ინსტრუმენტად.

აღნიშნული ღონისძიების შემოქმედებს კი მოვუწოდებთ სინანულისაკენ და შევახსენებთ, რომ ამგვარი მკრეხელობის ჩამდენი, შეუნანებლობის შემთხვევაში, საეკლესიო სასჯელის სახით, ეკლესიიდან განკვეთას ექვემდებარება", — აღნიშნულია განცხადებაში.

დათა თავაძის სპექტაკლ "ლიბერტე"ს პრემიერა 2024 წლის ოქტომბრის ბოლოს გაიმართა. თეატრისა და მსახიობების ხუთთვიანი გაფიცვისა და პაუზის შემდეგ წარმოდგენები ანშლაგით განახლდა.

რამდენიმე დღის წინ, პროპაგანდისტულ ტელეკომპანია "იმედის" ეთერში სპექტაკლ "ლიბერტეზე" სიუჟეტი მომზადდა, სადაც კონტექსტიდან ამოგლეჯილი ფრაზები და კადრები უჩვენეს მაყურებელს, რამაც საზოგადოების ნაწილის მღელვარება გამოიწვია. აღსანიშნავია, რომ კადრები ერთ-ერთმა მაყურებელმა მალულად გადაიღო, რადგან მისი გადაღება აკრძალულია და +18 ასაკობრივი ცენზიც აქვს სპექტაკლს.

გუშინ, 8 მაისს სამეფო უბნის თეატრთან პრიმაკოვის ქართულ-რუსული ცენტის ხელმძღვანელის, დიმიტრი ლორთქიფანიძის მიერ დაგეგმილი აქცია გაიმართა. აქციის მონაწილეები თეატრს "რელიგიური გრძნობების შეურაცხყოფაში" ადანაშაულებდნენ და მერიას თეატრისთვის საბიუჯეტო დაფინანსების შეწყვეტას სთხოვდნენ. აქციაზე იმყოფებოდა ქართველი კომუნისტური პარტიის ლიდერი გრიშა ონიანიც.