ზუგდიდის საკრებულოს თავმჯდომარის მოადგილემ, თაზო ფაცაციამ თინა ბოკუჩავაზე დაწერილი სექსისტური პოსტი "აღშფოთებითა" და "ემოციური ფონით" გაამართლა. ფაცაცია წერს, რომ პოსტი "მიუღებელი" იყო და ბოდიშს იხდის.

On.ge-სთან საუბარში თავდაპირველად მან თქვა, რომ პოსტი არ წაუშლია. ბოდიშის მოხდის შემდგომ კი თქვა, რომ თავად წაშალა.

"მე თვითონ, ჩემი აზრით, ინტერპრეტაცია ვერ მივეცი სწორად და წავშალე", — განაცხადა მან On.ge-სთან საუბრისას.

ეს ფაცაციას ერთადერთი პოსტი არ არის, რომელიც სექსისტური და დისკრიმინაციული შინაარსისაა. მანამდე ის ნაციონალური მოძრაობის წევრზე, ანი წითლიძეზე წერდა: "გოგო ხარ თუ ალქაჯი". ასევე ამბობდა, რომ წითლიზეს ის "უყვარს" და მასზე "გიჟდება".

კითხვაზე, მიაჩნია, თუ არა ეს არასწორად, ფაცაცია პასუხობს: "ანა წითლიძე თვითონ რას ამბობს ის ნახეთ და მასთან მიმართებაში გააკეთეთ".

ის ამტკიცებს, რომ წითლიზეზე პოსტი შეურაცხმყოფელი არაა და "იუმორისტულად" არის ნათქვამი. თუმცა, ამავდროულად ამბობს, რომ ამ ფორმით პასუხი გასცა წითლიძეს, რომელმაც მანამდე მას მიაყენა შეურაცხყოფა. მანვე დაამატა, რომ წითლიძესთან მეგობრობს.

"ზონდერი და ალქაჯი თვითონაც მიწოდა და როდესაც გიწოდებენ, რა თქმა უნდა, ეტყვი ადამიანი. მაგრამ ჩვენ ვმეგობრობთ, საკრებულოს წევრები ვართ და ერთმანეთს ნორმალურ სალამს და გამარჯობას ვეუბნებით. უბრალოდ, წინასაარჩევნო კამპანიის პერიოდში ასე გამოვიდა", — განაცხადა ფაცაციამ.

საკრებულოს დეპუტატი ამბობს, რომ პოსტის წაშლა მისთვის პარტიიდან არავის მოუთხოვია. მისი თქმით, გადაწყვეტილება თავად მიიღო.

"თან პარტიასაც, ზოგადად, არ აქვს ისეთი მიმართულება, რომ ჩვენ დავაზიანოთ ვინმე ან ვინემს შეურაცხყოფა მივაყენოთ. რახან ასე იყო და ცუდად მიიღო საზოგადოებამ ავიღე და წავშალე", — ამბობს ის.