15 ივლისიდან თბილისსა და შანხაის შორის პირდაპირი რეგულარული ავიამიმოსვლა დაიწყო. ახალ მიმართულებაზე ფრენებს ჩინური ავიაკომპანია China Eastern Airlines კვირაში 3-ჯერ — ყოველ ოთხშაბათს, პარასკევსა და კვირას შეასრულებს. ეს არის რიგით მესამე ჩინური ავიაგადამყვანი, რომელიც საქართველოს ბაზარზე პირდაპირი რეგულარული რეისებით ოპერირებას იწყებს

თბილისი-შანხაის საინაუგურაციო რეისთან დაკავშირებით გამართულ ღონისძიებაზე ირაკლი კობახიძემ განაცხადა, რომ "ჩინეთთან პარტნიორობას, მეგობრობას, ურთიერთობას აქვს განსაკუთრებულზე განსაკუთრებული მნიშვნელობა". მისივე თქმით, "ყველა სფეროში ჩინეთი არის უაღრესად წარმატებული, რაც არის ჩინეთის ხელისუფლების, ჩინეთის პრეზიდენტის, ბატონი სი ძინპინის ბრძნული პოლიტიკის შედეგი".

"საქართველოსა და ჩინეთს შორის ურთიერთობები ძალიან სწრაფი ტემპით ვითარდება. ჩვენ დაახლოებით ორი წლის წინ ხელი მოვაწერეთ სტრატეგიული პარტნიორობის შეთანხმებას, რასაც უკვე ჰქონდა ძალიან კონკრეტული, ხელშესახები შედეგები ჩვენი ქვეყნებისთვის. და სულ ცოტა ხნის წინ ხელი მოვაწერეთ ყოვლისმომცველი სტრატეგიული პარტნიორობის შეთანხმებას ჩვენ ორ ქვეყანას შორის.

ჩვენთვის ჩინეთთან პარტნიორობას, მეგობრობას, ურთიერთობას აქვს განსაკუთრებულზე განსაკუთრებული მნიშვნელობა. ჩინეთი არის მშვიდობიანი სახელმწიფო, ჩინეთი არის თავიდან ბოლომდე ორიენტირებული მის განვითარებაზე, მოდერნიზაციაზე, პროგრესზე. ყველა სფეროში ჩინეთი არის უაღრესად წარმატებული, რაც არის ჩინეთის ხელისუფლების, ჩინეთის პრეზიდენტის, ბატონი სი ძინპინის ბრძნული პოლიტიკის შედეგი.

ჩვენ ყველაფერს ვაკეთებთ იმისათვის, რომ კიდევ უფრო მეტად განვითარდეს ჩვენი ორმხრივი ურთიერთობები ორ ქვეყანას შორის. ჩვენთვის ძალიან მნიშვნელოვანია პოლიტიკური მჭიდრო თანამშრომლობა საქართველოსა და ჩინეთს შორის. მოხარული ვარ, რომ ძალიან სწრაფად ვითარდება ეკონომიკური პარტნიორობა ქვეყნებს შორის. განსაკუთრებულ ყურადღებას ვუთმობთ, რა თქმა უნდა, განათლების, კულტურის სფეროში თანამშრომლობას. პირდაპირი ფრენები ძალიან დიდ წვლილს შეიტანს ჩვენი ორმხრივი ურთიერთობების განვითარებაში", — განაცხადა ირაკლი კობახიძემ თბილისი-შანხაის საინაუგურაციო რეისთან დაკავშირებით გამართულ ღონისძიებაზე.