ევროკავშირის ცხრა წევრი ქვეყნის სპორტის მინისტრი ევროკავშირის სპორტის კომისარს, გლენ მიკალეფს ოფიციალური წერილით მიმართავს და საერთაშორისო ოლიმპიური კომიტეტისთვის (IOC) ევროპული დაფინანსების შეწყვეტას სთხოვს. ამის მიზეზი საერთაშორისო კომიტეტის მიერ გასულ კვირას მიღებული გადაწყვეტილებაა, რომლითაც რუსეთის ოლიმპიურ კომიტეტს დაწესებული შეზღუდვები მოეხსნა. ინფორმაციას POLITICO ავრცელებს.

ღია წერილს, რომელიც ევროკავშირში შვედეთის მუდმივმა წარმომადგენლობამ გამოაქვეყნა, ხელს აწერენ შვედეთის, ესტონეთის, ნიდერლანდების, ლიეტუვის, ლატვიის, პოლონეთის, რუმინეთის, ფინეთისა და დანიის სპორტის მინისტრები.

მინისტრები კომისარ მიკალეფს მოუწოდებენ, უზრუნველყოს, რომ იმ ორგანიზაციებმა, რომელთა ქმედებებიც ეწინააღმდეგება ევროკავშირის ღირებულებებს, ევროპული მხარდაჭერითა და ფონდებით ვერ ისარგებლონ.

შვედეთის სოციალურ საქმეთა მინისტრმა, იაკობ ფორსმედმა ხაზგასმით აღნიშნა, რომ უკრაინაში რეალურად არაფერი შეცვლილა და კრემლი კვლავ აგრძელებს სისხლიან ომს.

"ადგილზე არაფერი შეცვლილა. რუსეთი კვლავ აგრძელებს სასტიკ აგრესიულ ომს უკრაინის წინააღმდეგ. აქედან გამომდინარე, ევროკავშირის დაფინანსების პროგრამები და თანამშრომლობის ჩარჩოები არ შეიძლება ისე ჩამოყალიბდეს, რომ ამან რუსეთის აგრესიის ნორმალიზების რისკი შექმნას", — განაცხადა მან.

მინისტრების განცხადებით, ნებისმიერი მტკიცება იმის შესახებ, რომ სპორტი შეიძლება გაიმიჯნოს პოლიტიკისგან, "ყოველგვარ საფუძველსაა მოკლებული", რადგან ომის გამო უკრაინელი სპორტსმენები კვლავ მოკლებულნი არიან საერთაშორისო შეჯიბრებებისთვის თანაბარ პირობებში მომზადების შესაძლებლობას.

საერთაშორისო ოლიმპიურმა კომიტეტმა რუსეთის ოლიმპიურ კომიტეტს დისკვალიფიკაცია (რომელიც ძალაში 2023 წლის ოქტომბრიდან იყო) გასულ კვირას შეუჩერა. ორგანიზაციის განმარტებით, გადაწყვეტილების მიზეზი გახდა ის, რომ რუსეთის ოლიმპიური კომიტეტის შემადგენლობაში აღარ შედიან უკრაინის ოკუპირებული ტერიტორიების რეგიონული სპორტული ორგანიზაციები.

ევროპელი მინისტრები კი მიიჩნევენ, რომ ეს არგუმენტი არასაკმარისია და რუსი სპორტსმენების წინააღმდეგ სანქციები სრულად უნდა შენარჩუნდეს.

ღია წერილში ცხრა ქვეყნის სპორტის მინისტრები ევროკავშირს მოუწოდებენ, დაფინანსება შეუწყვიტოს კიდევ ორ მსხვილ სპორტულ გაერთიანებას:

• წყლის სახეობათა საერთაშორისო ფედერაციას (World Aquatics);
• ტანვარჯიშის საერთაშორისო ფედერაციას (FIG).

აღნიშნულმა ორგანიზაციებმა, საერთაშორისო ოლიმპიური კომიტეტის მსგავსად, ბოლო პერიოდში რუს სპორტსმენებს შეჯიბრებებში მონაწილეობის უფლება აღუდგინეს.