დღეს, 16 მაისს ზუგდიდის საკრებულოს თავმჯდომარის მოადგილემ, თაზო ფაცაციამ ნაციონალური მოძრაობის დეპუტატი თინათინ ბოკუჩავა სექსისტურ და შეურაცხმყოფელ კონტექსტში მოიხსენია. ფაცაციამ On.ge-სთან საუბარში განაცხადა, რომ პოსტში სექსი არ უხსენებია და შესაბამისად, მისი განცხადება სექსისტური ვერ იქნება. მანვე აღნიშნა, რომ კარგ ოჯახშია გაზრდილი და იცის ადამიანებთან როგორ იურთიერთოს.

მალევე ეს პოსტი "გაქრა", თუმცა განაცხადა, რომ თავად არ წაუშლია. რამდენიმე წუთში კი სექსიზმი დისკრიმინაციული შინაარსის პოსტით ჩაანაცვლა და საარჩევნო მოწოდება დაპოსტა.

ეს პირველი შემთხვევა არაა, როცა ფაცაცია ფეისბუქით დისკრიმინაციული შინაარსის განცხადებებს ავრცელებს. გუშინ, 15 მაისს მან ნაციონალური მოძრაობის კიდევ ერთი წევრი ანი წითლიძე მოიხსენია სექსისტურად. ფაცაცია წითლიძეს ალქაჯს ადარებს და წერს, რომ ქალი პოლიტიკოსი მასზე "გიჟდება", "უყვარს" და "ჭკუა ეკეტება".

გარდა ამისა, არჩევნების საკითხზე ფაცაციას პოსტების ნაწილი ქსენოფობიურია. ის ხაზს უსვამს სანდრა რულოვსის წარმომავლობას და "მეგრელობას" განსაკუთრებულ მნიშვნელობას ანიჭებს.

ფეისბუქის პირადი ანგარიშის გარდა, ფაცაციას, როგორც საკრებულოს დეპუტატს, ოფიციალური გვერდიც აქვს. დეპუტატი არც აქ ერიდება დისკრიმინაციული შინაარსის პოსტების გამოქვეყნებას. მაგალითად, მას გაზიარებული აქვს სხვა პირის პოსტი, რომლისთვისაც ავტორს მადლობას უხდის. პოსტი ქსენოფობიური შინაარსისაა. აქვე დისკრიმინაციულად არის მოხსენიებული იეჰოვას მოწმეთა რელიგია და ჰომოსექსუალობა.

გარდა ამისა, პოსტში წერია, რომ სანდრა რულოვსი ორგანოებით ვაჭრობდა. ამ საკითხზე რულოვსისთვის ბრალი არასდროს წარუდგენიათ, ფაცაცია კი პოსტს "მამხილებელს" უწოდებს.

ბოლო რამდენიმე თვეა ფაცაცია, ძირითადად, არჩევნებზე პოსტავს. ის მუდმივად აზიარებს ქართული ოცნების კანდიდატზე დადებითი შინაარსის პოსტებს და პარალელურად, სანდრა რულოვსის დისკრედიტაციას აგრძელებს.

ფაცაცია აზიარებს ისეთი შინაარსის მასალებს, რომლებშიც ზუგდიდის მერობის კანდიდატი გაკრიტიკებულია ან დამამცირებლად არის მოხსენიებული.

12 აპრილს მას გაზიარებული აქვს ერთ-ერთი ონლაინ სააგენტოს ნიუსი, რომელშიც წერია, რომ ლალი მოროშკინას სანდრა რულოვსის პირადი ცხოვრების ამსახველი კადრები აქვს, რომელიც "ხელუხლებელია, ჯერ!"

საკუთარ პროფილის ფოტოზეც კი ის სანდრა რულოვსს ახსენებს და მის "დაჩოქების" პირობას დებს.

ქალთა მოძრაობამ მოუწოდა ქართულ ოცნებას სექსისტური განცხადების გამო, თაზო ფაცაცია პარტიიდან გარიცხონ. პარლამენტის დეპუტატი უმრავლესობიდან ზაქარია ქუცნაშვილი ამტკიცებს, რომ მისთვის მიუღებელია სექსისტური გამონათქვამები და ადამიანის შეურაცხყოფა. თუმცა ბოკუჩავაზე ამბობს, რომ "რაც დათესა, ის მოიმკო". კითხვაზე, მისი ნათქვამი წაახალისებს თუ არა ბოკუჩავას მიმართ აგრესიას, ქუცნაშვილი პასუხობს, რომ "არა".

ქართული ოცნების საერთაშორისო მდივანი, თამარ ჩუგოშვილი კი ფაცაციას სექსისტურ განცხადებას ემიჯნება. ჩუგოშვილი On.ge-სთან ამბობს, რომ მისთვის მსგავსი კომენტარი მიუღებელია.

"წაშალა, როგორც ვიცი, მაგრამ ეს არ არის საკმარისი. არ შეიძლება პოლიტიკური პროცესი ასეთ ბინძურ კომენტარებში გადავიდეს, მით უმეტეს რომ ქალები ხდებიან ასეთი კომენტარების ობიექტები. მეც გამომიცდია და ყოვლად მიუღებელია ჩემთვის", — თქვა ჩუგოშვილმა.