პირს, რომელმაც გორში არაფხიზელ მდგომარეობაში დედა-შვილს მანქანა დააჯახა და მათ სიცოცხლე მოუსწრაფა, საგზაო წესების დარღვევისთვის 250 ჯარიმა ჰქონდა გამოწერილი — საქმის პროკურორზე დაყრდნობით ინფორმაციას "ქართლის ამბები" ავრცელებს.

"ბრალდებულს 225 ვიდეოჯარიმა ჰქონდა, მათ შორის სიჩქარის გადაჭარბებაზე," — განაცხადა პროკურორმა, შორენა მგალობლიშვილმა.

გარდაცვლილი დედა-შვილის ნათესავმა, ირმა ამბარდნიშვილმა "პალიტრანიუსის" გადაცემაში "360 გრადუსი" განაცხადა, რომ პირს ბრალდება უნდა გადაუკვალიფიცირდეს და განზრახ მკვლელობის ბრალდებით გაასამართლონ.

"პროკურატურამ 276-ე მუხლის მეცხრე ნაწილით აღძრა, რაც სატრანსპორტო მოძრაობის წესების დარღვევასთანაა დაკავშირებული, ჩვენ ვითხოვთ, რომ განზრახ მკვლელობის მუხლით უნდა აღიძრას. ორი ადამიანი მოკლა, მიაჭყლიტა და გაიქცა, უგონო მთვრალმა. პროკურორი შორენა მგალობლიშვილი წერს, რომ 225 ჯარიმა ჰქონდა ბოლო წელში გამოწერილი.

მე ვკითხულობ, როდემდე უნდა გაგრძელდეს ამ უდანაშაულო ადამიანების ხოცვა? ეს თავაშვებული მძღოლები, მთვრალები, ნარკოტიკების ზემოქმედების ქვეშ, პირდაპირ ციხეში უნდა წავიდნენ. ყველა უნდა გამოვიდეს, ყველა გვერდში უნდა დაგვიდგეს, უნდა ავლაგმოთ ამათი თარეში. სასჯელის უმაღლეს ზომას ვითხოვთ, ნუ გაგვამწარებენ ისედაც გამწარებულს, ჩვენ არ დავიხევთ უკან. უნდა დალპეს ციხეში, კანონმა უნდა იზეიმოს. ჩვენ მუხლს არ ვეთანხმებით, ექსპერტიზის დასკვნას ველოდებით და დავიწყებთ ბრძოლას, არცერთი წუთით უკან დამხევები არ ვართ," — ამბობს გარდაცვლილის ახლობელი.

ირმა ამბარდნიშვილის განცხადებით, მანქანაში სხვა, არაფხიზელ მდგომარეობაში მყოფი პირებიც ისხდნენ და ავარიის შემდეგ შემთხვევის ადგილიდან მიიმალნენ. ოჯახი მათ წინააღმდეგაც მოითხოვს სისხლისსამართლებრივი დევნის დაწყებას.

"როგორც თვითმხილველებმა თქვეს, მანქანაში იჯდა ორი მცირეწლოვანი და კიდევ ორი, მასზე უგონოდ მთვრალი, ნარკოტიკების ზემოქმედების ქვეშ მყოფი დეიდაშვილები. ისინი სასწრაფოდ გაარიდა ადგილიდან, რომ დაემალა მათი თანამონაწილეობა. ვითხოვთ, სანამ უცხოეთში გადავლენ, მათ დაკავებას. განსაცდელში მიტოვების მუხლით უნდა აღიძრას მათი საქმე. მიატოვეს, რატომ არ გადმოვიდნენ და დახმარება აღმოუჩინეს, იქნებ ეცოცხლათ? ეტყობა ურჩიეს და ერთმა აიღო თავზე პასუხისმგებლობა და დეიდაშვილები დაფარა. მათზეც უნდა გავრცელდეს ციხე, ვინც მთვრალს ჩაუჯდება. გინდა ავტომატი გადაგიკიდებიათ ზურგზე და გინდა მთვრალებს გივლიათ. ვის ხოცავთ, ვის გაზრდილ შვილებს ხოცავთ?" — განაცხადა ირმა ამბარდნიშვილმა.

შეგახსენებთ, რომ დაკავებულს ბრალი წარედგინა სსკ-ის 276-ე მუხლის მე-9 ნაწილით (ტრანსპორტის მოძრაობის უსაფრთხოების ან ექსპლუატაციის წესის დარღვევა სიმთვრალეში, რამაც ორი ან მეტი ადამიანის სიცოცხლის მოსპობა გამოიწვია), რაც სასჯელის სახედ და ზომად 9-დან 12 წლამდე თავისუფლების აღკვეთას ითვალისწინებს.

პროკურატურამ აღკვეთის ღონისძიების სახით პატიმრობა მოითხოვა, რაც სასამართლომ დააკმაყოფილა.

დედა-შვილს, გორში, ჭავჭავაძის გამზირზე, კინოთეატრ "გამარჯვების" შენობის წინ მანქანა 13 ივლისს დაეჯახა. კლინიკაში გადაყვანის შემდეგ დაიღუპა დედაც და მისი 3 წლის შვილიც.