თიბისი ბანკის დამფუძნებელი, მამუკა ხაზარაძე ამბობს, რომ ანაკლიის ღრმაწყლოვანი პორტის მშენებლობისთვის სახელმწიფომ რკინიგზა და გზა უნდა გაიყვანოს.

ხაზარაძე, რომელიც ამავე დროს ანაკლიის განვითარების კონსორციუმის დამფუძნებელია, ყვება, რომ 2018 წელს ინფრასტრუქტურის პროექტირების ტენდერი ოთხჯერ ჩავარდა. მისივე თქმით, ამ პირობას ბანკები (ოპიკი, ევროპის რეკონსტრუქციისა და განვითარების ბანკი, აზიის განვითარების ბანკი და აზიის ინფრასტრუქტურის განვითარების ბანკი) აყენებენ და სახელმწიფოსგან გარანტიას ითხოვენ.

"ბანკებს ეჭვი ეპარებათ, რომ პორტის მშენებლობის პარალელურად მოესწრება 18 კილომეტრი გზის გაყვანა. ამიტომ ამბობენ, თუ ჩვენ ამ რისკს ვიღებთ, თქვენ აიღეთ ვალდებულება დანარჩენ ინფრასტრუქტურულ რისკებზეო. ლაპარაკია მხოლოდ პროცენტის დაფინანსებაზე და არა მთლიანად 400 მილიონზე", — განაცხადა ბიზნესმენმა კვირის პალიტრასთან ინტერვიუს დროს.

გარდა ამისა, ხაზარაძე ამბობს, რომ სახელმწიფოს პროექტში თანხა არ ჩაუდევს, ხოლო გამოყოფილი 100 მილიონი ძვირადღირებული სუბორდინირებული სესხია, რომელსაც კონსორციუმი პროექტის ფინანსური დახურვის შემდეგ მიიღებს. მისივე თქმით, მასსა და ბადრი ჯაფარიძეზე, როგორც დაქირავებულ მენეჯერებზე, ისე საუბრობენ:

"დაქირავებული მენეჯერები და ბიუროკრატები თავად არიან. ინფრასტრუქტურის მინისტრი, რომელიც ნამყოფი არ არის ანაკლიაში, არც გემი უნახავს, არც ის სამუშაო, რომელიც ჩატარდა და შეფასებებს აკეთებს, რა ჰქვია ამას?! ოთხჯერ რომ ჩავარდა ანაკლიაში გზისა და რკინიგზის დაპროექტების ტენდერი, მილიარდი ლარი რომ ვერ აითვისა ქვეყანამ შარშან ინფრასტრუქტურულ პროექტებში, ეს რისი ან ვისი ბრალია?! ჩვენ ახალი სახსრები უნდა მოვიზიდოთ საერთაშორისო ინსტიტუტებისგან და ამათ აგერ ანგარიშზე აქვთ თანხა ბიუჯეტში, ვერ ითვისებენ და ამ ადამიანებისგან გვესმის პრეტენზიები", — ამბობს ბიზნესმენი.

2016 წელს ანაკლიის განვითარების კონსორციუმმა და სახელმწიფომ ერთობლივად დაიწყეს ანაკლიის ღრმაწყლოვან პროექტზე მუშაობა. ანაკლიის განვითარების კონსორციუმში შედის თიბისი ჰოლდინგ საქართველო. პროექტის მიხედვით, 2021 წელს სამუშაოების სრულად დასრულების შემდეგ, ის 3 000 ჰექტარზე მეტ ფართობზე იქნება გაშლილი, რომელსაც 32 ნავმისადგომი ექნება. ანაკლიის პორტის გამტარუნარიანობა, წელიწადში, 100 მლნ ტონა იქნება.

ამავე თემაზე: