ანაკლიის განვითარების კონსორციუმის გენერალური დირექტორის, ლევან ახვლედიანის თქმით, თიბისი ბანკის საქმე ანაკლიის პორტის მშენებლობის პროცესს ხელს უშლის. ამის შესახებ მან გადაცემა რეაქციაში ისაუბრა.

"რომ ვთქვა, რომ ეს არ უშლის ხელს ჩვენს პროცესებს, რათა მივიდეთ ბოლომდე, არ იქნება მართალი. ჩვენ გვეშლება ხელი. თუნდაც ის განმარტებები, რომლის გაკეთება მე მიწევს დღეს, იგივე მიწევს მე ინვესტორებთან. ამ პროცესებში ხელს გვიშლის, მაგრამ არ გავჩერებულვართ", — აღნიშნა ახვლედიანმა.

მისივე თქმით, ტენდერის მოგების შემდეგ მშენებლობის ნებართვა 2017 წელს მოიპოვეს და ამ ხნის განმავლობაში ხელშეკრულებით გათვალისწინებული ყველა პირობა შეასრულეს. ახვლედიანი ამბობს, რომ შეთანხმებისამებრ პორტი 2020 წელს გაიხსნება.

ანაკლიის განვითარების კონსორციუმი საერთაშორისო კომპანიებს აერთიანებს, რომლებიც საქართველოს მთავრობასთან ერთად ანაკლიის ღრმაწყლოვანი პორტის მშენებლობაზე მუშაობენ. კონსორციუმის დამფუძნებელი ბიზნესმენი მამუკა ხაზარაძეა და მასში თიბისი ჰოლდინგიც შედის.

თავის მხრივ ეკონომიკის მინისტრმა, გიორგი ქობულიამ აღიარა, რომ თიბისის დამფუძნებლების, მამუკა ხაზარაძისა და ბადრი ჯაფარიძის ირგვლივ შექმნილი ნეგატიური ფონი, კერძო ინვესტორებს "მინიმალური კაპიტალის" შეგროვებას ურთულებს "ანაკლიის პროექტის დასაძრავად".