ქართული ოცნების ერთ-ერთმა ლიდერმა, მამუკა მდინარაძემ განაცხადა, რომ უკრაინის ეკლესიის ავტოკეფალიაზე საუბარი მთავრობის მხრიდან არასწორია მანამ, სანამ საპატრიარქო თავის პოზიციას არ დააფიქსირებს.

"ბუნებრივია, ველოდებით ეკლესიის პოზიციას. არ შეიძლება, რომ მე თქვენს წინაშე გავაკეთო კომენტარები ამ საკითხზე...ამაზე მე მგონია, რომ ზედმეტი აჟიოტაჟის შექმნა არის ხელოვნური და ეს არ უნდა გავაკეთოთ", — განაცხადა მდინარაძემ.

მას შემდეგ, რაც მსოფლიო პატრიარქმა უკრაინის ეკლესიის პატრიარქს ტომოსი ოფიციალურად გადასცა, საქართველოში მოქალაქეთა ნაწილმა განაცხადა, რომ საპატრიარქომ თუ არა, მთავრობამ პოზიცია უნდა დააფიქსიროს და უკრაინას ავტოკეფალია მიულოცოს. ამ დრომდე, მთავრობის წარმომადგენლებს განცხადება არ გაუვრცელებიათ.

უკრაინის ავტოკეფალიის საკითხზე საპატრიარქო სინოდის მომდევნო სხდომაზე იმსჯელებს. ახალქალაქისა და კუმურდოს მიტროპოლიტის განცხადებით, მათ უნდა წაიკითხონ რა წერია ტომოსში.

უკრაინის ეკლესიის ავტოკეფალია და საქართველო

კიევის პატრიარქი უკრაინის ეკლესიის ავტოკეფალიის საკითხზე საქართველოს მხარდაჭერას ელოდება.

"საქართველოს ეკლესიას უნდა ახსოვდეს თავისი ისტორია", — განაცხადა კიევის პატრიარქმა, ფილარეტმა. როგორც ცნობილია, კიევის პატრიარქს საქართველოს კათოლიკოს-პატრიარქთან საუბარი არ ჰქონია.

საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდება.

პატრიარქის მდივნის, მიქაელ ბოტკოველის განცხადებით, სინოდის სხდომა გადაწყვეტს რა პოზიცია ექნება საქართველოს უკრაინის ეკლესიის ავტოკეფალიასთან მიმართებაში. თუმცა მისივე თქმით, ოკუპაციის პირობებში კონსტანტინოპოლის ეკლესიის უპირობო მხარდაჭერა არასწორია.

უკრაინის ეკლესიის ავტოკეფალიის საკითხი

უკრაინის ეკლესიისთვის ავტოკეფალიის მინიჭების საკითხი მსოფლიო პატრიარქსა და რუსეთის საპატრიარქოს შორის განხეთქილების მიზეზად იქცა.

კიევის საპატრიარქომ მსოფლიო პატრიარქს რუსეთის საპატრიარქოსგან გამოყოფა ამ წლის აპრილში სთხოვა. ამ გადაწყვეტილებას მხარი დაუჭირეს უკრაინის პრეზიდენტმა და უმაღლესმა რადამ. მსოფლიო პატრიარქი ბართლომე ამბობდა, რომ უკრაინა ავტოკეფალიას მალე მიიღებს, რადგან ეს მისი უფლებაა.

სინოდის სხდომის დროს რუსეთის საპატრიარქომ გადაწყვიტა, რომ უკრაინის საკითხის გამო მსოფლიო პატრიარქს ბართლომე პირველს ლოცვებში აღარ მოიხსენიებდა. ასევე, მის წარმომადგენლებთან ყველანაირ ურთიერთობას წყვეტდა.

მსოფლიო პატრიარქმა ბართლომემ ტომოსს ხელი 5 იანვარს მოაწერა. ტომოსის გადაცემისთვის კიევიდან სტამბოლში მრავალრიცხოვანი დელეგაცია ჩავიდა. მათ შორის იყვნენ სასულიერო პირები, უკრაინის მთავრობის წევრები, უმაღლესი რადას სპიკერი და პრეზიდენტი პეტრო პოროშენკო. ისინი ტომოსის საზეიმო ხელმოწერასაც ესწრებოდნენ.

6 იანვარს სტამბოლში წმინდა გიორგის ტაძარში მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს, მიტტროპოლიტ ეპიფანს ტომოსი გადასცა, რითაც ახალი ეკლესიის შექმნა ფორმალურად დასრულდა. უკრაინის მართლადიდებლური ეკლესია გახდა მე-15 ადგილობრივი ეკლესია

7 იანვარს კიევში, წმინდა სოფიას ტაძარში მიტროპოლიტი ეპიფანი, როგორ უკრაინული ეკლესიის წინამძღოლი საშობაო ლიტურგიას პირველად აღავლენს.