61 ხმა 1-ის წინააღმდეგ — კენჭისყრის ასეთი შედეგით, მექსიკის დედაქალაქ მეხიკოში ძალადობრივი კორიდა აიკრძალა. ამ გადაწყვეტილებით, იკრძალება სანახაობა, სადაც ცხოველებს მატადორები კლავენ ან ასახიჩრებენ ბასრი საგნების, მაგალითად, ხანჯლის გამოყენებით. ამასთან, დაწესდა დროითი შეზღუდვაც — ხარი რინგზე მხოლოდ 15 წუთით შეიძლება იმყოფებოდეს.

მეხიკოს მერის, კლარა ბრუგადას თქმით, ინიციატივა მიზნად ისახავს კორიდის ტრადიციის "ნაკლებად ძალადობრივად" გარდასახვას. მისი თქმით, დედაქალაქში ვერ დაუშვებენ, "სისასტიკე სანახაობად იქცეს, ცხოველები კი გართობის მიზნით აწამონ და ხოცონ". კანონმდებელი ვიქტორ უგო რომო დე ვივარი კი ამატებს, რომ მათი მიზანი "კორიდის გაუქმება კი არა, განვითარებაა".

მეხიკოს გადაწყვეტილებას მხარი დაუჭირა მექსიკის პრეზიდენტმა კლაუდია შეინბაუმმაც და თქვა, რომ ეს "კარგი გამოსავალია" კორიდის ინდუსტრიაში სამუშაო ადგილების შესანარჩუნებლად, ამასთან, ცხოველების ძალადობისგან დასაცავად.

თუმცა, გადაწყვეტილებას ქვეყანაში მაინც არაერთგვაროვანი გამოხმაურება მოჰყვა. ცხოველთა უფლებადამცველი აქტივისტები აკრძალვას სიხარულით შეხვდნენ, მაგრამ მოსახლეობის ნაწილი კორიდას კულტურის მნიშვნელოვან ელემენტად მიიჩნევს და მისით მიღებულ ფინანსურ სარგებელზეც ამახვილებს ყურადღებას. მაგალითად, 2023 წელს კორიდის ინდუსტრიაში 80 ათასამდე სამუშაო ადგილი გაჩნდა, შემოსავალმა კი $50 მილიონს მიაღწია.

აი, ცხოველთა უფლებადამცველი ორგანიზაციის ხელმძღვანელი ანტონ აგილარი გადაწყვეტილებას წინ გადადგმულ ნაბიჯად კი მიიჩნევს, მაგრამ ამატებს, რომ "არაძალადობრივი კორიდა არ ნიშნავს სანახაობას ცხოველის წამების გარეშე, რადგან ხარები რინგზე მაინც დიდი და სრულიად არასაჭირო სტრესის ქვეშ არიან".

კორიდა, რომელიც ლათინური ამერიკის ქვეყნებში საუკუნოვანი ტრადიციაა, ბოლო წლებში კრიტიკის ობიექტი გახდა ცხოველებისადმი სასტიკი მოპყრობის გამო. ცხოველთა უფლებადამცველების შეფასებით, ყოველწლიურად მსოფლიოში 180 ათასამდე ხარი იხოცება ამ სანახაობისთვის.

აღსანიშნავია, რომ კორიდა მექსიკის რამდენიმე შტატში აკრძალულია. სასტიკი სანახაობა 2027 წლიდან აიკრძალება კოლუმბიაშიც. ამავე რეგიონში, ეკვადორის დედაქალაქმა სპორტულ ღონისძიებებში ცხოველების დახოცვა აკრძალა.