თბილისის მერიამ ვაკის პარკის ტერიტორიაზე არსებული შადრევნებისა და კასკადის სარეაბილიტაციო სამუშაოების პროექტირება-მშენებლობისთვის ტენდერი გამოაცხადა. წინადადებების მიღება 23 მარტს იწყება და 28-ში სრულდება. ტენდერის ღირებულება 47 მილიონი ლარია.

პროექტი სამწლიანია და დაფინანსების წყარო თბილისის ბიუჯეტის სახსრებია. თანხები წლების მიხედვით ასე ნაწილდება: 2025 წელს — 10 000 000 ლარი; 2026 წელი — 18 000 000 ლარი; 2027 წელი —19 000 000 ლარი.

სატენდერო დოკუმენტაციის მიხედვით, პრეტენდენტს 2020 წლის 01 იანვრიდან უნდა გააჩნდეს არანაკლებ 26 000 000 ლარის ღირებულების რეკრეაციული ტერიტორიების მოწყობის ან/და რეკონსტრუქციის ან/და რეაბილიტაციის სამუშაოების შესრულების გამოცდილება, მათ შორის ერთი დასრულებული ხელშეკრულების ფარგლებში განხორციელებული არანაკლებ 7 850 000 ლარის ღირებულების რეკრეაციული ტერიტორიების მოწყობის ან/და რეკონსტრუქციის ან/და რეაბილიტაციის სამუშაოების შესრულების გამოცდილება, აგრეთვე, არანაკლებ 1 000 000,00 ლარის ღირებულების შადრევნ(ებ)ის მოწყობის ან/და რეკონსტრუქციის ან/და რეაბილიტაციის სამუშაოების შესრულების გამოცდილება.

ტენდერის ტექნიკური დოკუმენტაციის თანახმად: არსებული კასკადი და შადრევნები უნდა აღდგეს პირვანდელი ვიზუალით;

ტერიტორია დაპროექტებული უნდა იყოს საქართველოში არსებული უსაფრთხოების ნორმების დაცვით;

პროექტის შემუშავებისას გათვალისწინებული უნდა იყოს თანამედროვე სტანდარტების სამშენებლო მასალების გამოყენება;

სამშენებლო მოედნის საანგარიშო სეისმურობად მიღებული უნდა იყოს მინიმუმ 8 ბალი.

როგორც bm.ge წერს, აღსანიშნავია, რომ კასკადის სამუშაოების დასრულება სრულად ჯერ 2022 წლის ბოლოსთვის, ხოლო შემდეგ 2023 წლის გაზაფხულზე ანონსდებოდა. ვაკის პარკის სარეაბილიტაციო სამუშაოები 2020 წელს დაიწყო. 2022 წლის მდგომარეობით, ვაკის პარკის აღდგენის პროექტზე 33 მილიონ ლარამდე დაიხარჯა, საიდანაც 11.8 მილიონი ლარის ხელშეკრულება “გრინსერვისი+”-თან გაფორმდა. ამ თანხიდან 6.5 მილიონი ლარი კი კასკადისა და შადრევნების რეაბილიტაციაზე დაიხარჯა. 2022 წლის 13 ოქტომბერს, ვაკის პარკში მომხდარ ტრაგედიის შედეგად, ერთი მოზარდი დაიღუპა, ხოლო ორი დაშავდა. საქმეზე დაკავებულები არიან, როგორც შადრევნის მშენებელი კომპანია "გრინსერვისი+“-ის თანამშრომლები, ისე "მშენ-ექსპერტის“ და „ნიუ მეტალ დიზაინის“ თანამშრომლები. მაშინ დააკავეს ასევე თბილისის მერიის ორი მაღალჩინოსანი. თბილისის საქალაქო სასამართლომ ვაკის პარკში მომხდარი ტრაგედიის საქმეზე ბრალდებული 9 პირიდან მხოლოდ ერთი, ვალერი გობეჯიშვილი გაამართლა, დანარჩენი 8 პირი კი დამნაშავედ ცნო.