The Last of Us-ის მსახიობმა, ემის ნომინანტმა ბელა რამზიმ ბრიტანულ ვოგთან ინტერვიუში გაამხილა, რომ აუტიზმის დიაგნოზი მას შემდეგ დაუსვეს, რაც სერიალის გადამღები ჯგუფის ერთ-ერთმა წევრმა უთხრა, რომ აუტიზმის ნიშნები ჰქონდა. რემზის თქმით, დიაგნოზის მიღება მისთვის "გამათავისუფლებელი" იყო.

"ნეიროდივერგენციაზე ადრეც მისაუბრია, თუმცა რაღაც მიზეზების გამო არ მინდოდა ყველაფრის გამხელა. The Last of Us-ის პირველი სეზონის გადაღებისას დამისვეს აუტიზმის დიაგნოზი," — თქვა მსახიობმა.

ფოტო: HBO

მისი თქმით. გადამღები ჯგუფის ერთ-ერთმა წევრმა, რომელსაც აუტიზმის მქონე შვილი ჰყავს, დაასკვნა, რომ რემზისაც მსგავსი თვისებები ჰქონდა, რამაც მსახიობს ფორმალური ფსიქიატრიული შეფასებისა და დიაგნოზის გაგებისკენ უბიძგა. რემზიმ თქვა, რომ თავს ხშირად მიიჩნევდა "უცნაურად" და "მარტოსულად", ამიტომ ხშირად ფიქრობდა, რომ შესაძლოა, აუტიზმი ჰქონოდა. რემზის სენსორული პრობლემებიც აქვს, რაც აუტიზმის სპექტრზე მყოფთათვის დამახასიათებელია, და თქვა, რომ "ადამიანების მცირე მიმიკებსა და სხეულის ენას მტკივნეული სიზუსტით აკვირდებოდა".

მსახიობის თქმით, დიაგნოზის გაგებამ "საკუთარი თავის მიმართ მეტი გულისხმიერების გამოჩენისკენ" უბიძგა და მეტ გაგებას იჩენს, როცა ყოველდღიური მარტივი დავალებების შესრულება ისე არ შეუძლია, როგორც სხვებს.

"ადამიანებს სულ ვუყურებდი და მათგან ვსწავლობდი. სოციალიზაციისა და ხალხთან კომუნიკაციის მექანიკურად შესწავლა როლების შესრულებაშიც მეხმარება," — ამბობს მსახიობი.

The Last of Us-ში ბელა რემზი ელი უილიამსის როლს ასრულებს. სერიალი მეორე სეზონით მაყურებელს 13 აპრილს დაუბრუნდება.