ქართული ოცნების ხელისუფლებამ გურიას სტიქიის შედეგად წარმოქმნილი საჭიროებებისთვის სარეზერვო ფონდიდან 2 569 048 ლარი გამოიყო.

ოცნების ხელისუფლების ინფორმაციით, გამოყოფილი თანხა გურიის რეგიონის სამივე მუნიციპალიტეტზე განაწილდება. განკარგულებას ირაკლი კობახიძემ მოაწერა ხელი.

დოკუმენტის თანახმად, სტიქიის შედეგების სალიკვიდაციოდ ოზურგეთის მუნიციპალიტეტს — 1 228 062 ლარი, ჩოხატაურის მუნიციპალიტეტს — 794 968 ლარი, ხოლო ლანჩხუთის მუნიციპალიტეტს 546 018 ლარი გამოეყოფა.

შეგახსენებთ, თებერვლის ბოლოს დასავლეთ საქართველოში დიდთოვლობამ პრობლემები შექმნა გურიაში, აჭარასა და იმერეთში.

დიდთოვლობას მოჰყვა მსხვერპლიც. ოზურგეთის მუნიციპალიტეტის სოფელ კონჭკათში შუახნის მამაკაცი დაიღუპა. მოქალაქეთა ცნობით, ის მეზობელს სახლის დათოვლილი სახურავის გაწმენდაში ეხმარებოდა და ნგრევას ემსხვერპლა; "აჭარა თაიმსის" ცნობით, გაყინული კაცი იპოვეს ქობულეთში; სოფელ ნატანებში გარდაიცვალა ქალი, რომელიც 85 წლის დავრდომილ დედას უვლიდა. ქალის ცხედრის გამოტანა ამ ეტაპამდე ვერ ხერხდება.

სტიქიიდან მალევე, 25 თებერვალს მოხალისეებმა დიდთოვლობისგან დაზარალებული გურიის სოფლების დასახმარებლად Facebook-ჯგუფი "მოხალისეები გურიისთვის" შექმნეს. ჯგუფში სადაც ჯგუფის წევრები გურიის სოფლებში დიდთოვლობისგან შექმნილ პრობლემებზე წერდნენ, მოხალისეები რეგიონის დასახმარებლად დაირაზმნენ, თანხებს აგროვებდნენ და თვითორგანიზებულად ცდილობენ შეექმნათ ჯგუფები, რომლებიც ჩაკეტილ სოფლებში დარჩენილ მოქალაქეებს დაეხმარებოდნენ.

25 თებერვალს, მთავრობის ადმინისტრაციის ცნობით, ირაკლი კობახიძე მინისტრთა კაბინეტის წევრებთან ერთად გურიის რეგიონში ჩავიდა. კობახიძე დიდთოვლობის შედეგად გამოწვეულ პრობლემებსა და იმ ღონისძიებებს გაეცნო, რომელსაც სხვადასხვა უწყების წარმომადგენლები მოსახლეობის დახმარების მიზნით ახორციელებდნენ.

26 თებერვალს, გურიაში დიდთოვლობის შედეგად დაზარალებულების დასახმარებლად სპეციალური ვებგვერდი – Moxalise.ge შეიქმნა.

საიტზე მოხალისეებისთვის რუკა განათავსეს, სადაც მონიშნული იყო ის წერტილები, სადაც დახმარება იყო საჭირო, ხოლო რუკის მარცხენა მხარეს განთავსებული იყო ლეგენდა, რათა უკეთ გარკვეულიყვნენ მონიშნული ლოკაციის დეტალებზე.

28 თებერვალს, დასავლეთ საქართველოში, დიდთოვლობის სალიკვიდაციო სამუშაოებში სასაზღვრო პოლიციის ვერტმფრენი ჩაერთო.