აშშ-ში მოღვაწე ქართველი მომღერალი ნინი ბრეგვაძე, ცნობილი სასცენო სახელით Nini Iris, ევროვიზიაზე მონაწილეობასთან დაკავშირებით მიმართვას ავრცელებს. ნინიმ გულშემატკივრებს იანვარში შეატყობინა, რომ წლევანდელ ევროფესტივალზე საქართველოს სახელით მონაწილეობა სურდა და ამისთვის თავისი დაწერილი სიმღერა საზოგადოებრივ მაუწყებელსაც გაუგზავნა. იგი კონკურსის გულშემატკივრების მთავარ ფავორიტადაც მოიაზრებოდა. თუმცა, კიდევ ათობით სხვა კანდიდატურას შორის, საზმაუმ არჩევანი მარიამ შენგელიაზე შეაჩერა, რომელიც საკონკურსო სიმღერით Freedom ევროვიზიის ფანების რეიტინგში ამ დრომდე ბოლო ადგილს იკავებს.

მარიამ შენგელიას სიმღერის პრემიერიდან ერთი კვირის თავზე, Nini Iris ევროვიზიაზე საუბრობს და თავის ქართველ და უცხოელ ფანებს გულშემატკივრობისთვის მადლობას უხდის.

"გამომდინარე იქიდან, რომ მე და ჩემი გუნდი უამრავ შეტყობინებას ვიღებდით ევროვიზიაზე ჩემს მონაწილეობასთან დაკავშირებით, ვგრძნობ პასუხისმგებლობას, ვისაუბრო ამ საკითხზე", — ამბობს ნინი ვიდეომიმართვაში, — "2024 წლის დეკემბრის დასაწყისში, საზოგადოებრივ მაუწყებელს გავუგზავნე ჩემი კომპოზიცია Release Me, რომელიც შესანიშნავ პროდიუსერთან, ჯეისონ მეიტერთან ერთად შევქმენი.

"ეს სიმღერა ჩემთვის ძალიან ბევრს ნიშნავს, მასში მთელი ჩემი ძალისხმევა ჩავდე. თუმცა, ადგილობრივ კომისიას ვაცნობე, რომ საჭიროების შემთხვევაში, მზად ვიყავი, მათთან მეთანამშრომლა სხვა სიმღერაზე ან სხვა მიმართულებით წავსულიყავი. მიუხედავად იმისა, რომ შედეგი ისეთი არ აღმოჩნდა, როგორსაც ველოდი, მაინც მსურს, გაგიზიაროთ ჩემი სიმღერა, სახელწოდებით Release Me, რომელიც 25 აპრილს გამოვა. სიმღერა მოგვითხრობს ჩემს გაშიშვლებულ ემოციებზე და გულგატეხილობის დაძლევაზე".

სიმღერის პრემიერამდე კი თვეზე მეტი რჩება, მაგრამ უკვე შესაძლებელია, ტელეფონით ან მეილით სარეგისტრაციო ფორმა შეავსოთ, სიმღერა სტრიმინგ პლატფორმებზე წინასწარ შეინახოთ და ექსკლუზიური 30-წამიანი ნაწყვეტიც ახლავე მოისმინოთ. კომპოზიციის უფრო მცირე მონაკვეთი ნინიმ რამდენიმე დღის წინ სოციალურ ქსელშიც გამოაქვეყნა.

Nini Iris მსოფლიო მასშტაბით 2023 წელს გაიცნეს, როცა მან ამერიკულ ვოისში მიიღო მონაწილეობა. "ბრმა ქასთინგზე" სიმღერის შესრულების შემდეგ, ნინის ოთხივე მწვრთნელი ოვაციებით შემოუტრიალდა. ირლანდიელმა პოპვარსკვლავმა ნაილ ჰორანმა, რომელიც ნინიმ მოგვიანებით თავის მენტორად აირჩია, ქართველ მუსიკოსს "პოტენციური გამარჯვებული" უწოდა. Nini Iris პროექტს ნახევარფინალიდან გამოეთიშა, მაგრამ მან ამერიკელი ტელემაყურებლის დიდი მხარდაჭერა დაიმსახურა.

ნინი ბრეგვაძე საქართველოდან ნიუ-იორკში საცხოვრებლად და მუსიკალური კარიერის გასაგრძელებლად 2016 წელს გადავიდა. მუსიკოსის თქმით, უცხო ქვეყანაში თავის დასამკვიდრებლად გრძელი და რთული გზა გაიარა.

მანამდე, 2015 წელს, 18 წლის მომღერალი ქართული X ფაქტორის მეორე სეზონში გამოჩნდა და კონკურსის ფინალისტიც გახდა. გამორჩეული ვოკალური შესაძლებლობების მქონე მუსიკოსმა, რომელიც, ამავდროულად, ცეკვავდა და რეპავდა, მეგაშოუს ჟიური და მაყურებელი ერთნაირად აღაფრთოვანა.

ნინის გამოშვებული აქვს სამი სინგლი: Rhythm Of My Heartbeat (2019), Fade Away (2022) და Psycho (2024).

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...