რუსეთის პრეზიდენტმა ვლადიმერ პუტინმა ხელი მოაწერა განკარგულებას, სადაც ნათქვამია, რომ უკრაინის მოქალაქეებს, რომლებსაც არ აქვთ რუსეთის ფედერაციაში ყოფნის კანონიერი საფუძველი, 2025 წლის 10 სექტემბრამდე უნდა დატოვონ ქვეყანა ან "დაარეგულირონ თავიანთი სამართლებრივი სტატუსი რუსეთის ფედერაციაში".

შესაბამისი დოკუმენტი ოფიციალურ იურიდიულ საინფორმაციო პორტალზე გამოქვეყნდა.

განკარგულებაში ასევე ნათქვამია, რომ უცხოელებმა და მოქალაქეობის არმქონე პირებმა, რომლებიც მდებარეობენ თვითგამოცხადებული დონეცკის და ლუგანსკის ტერიტორიებზე, ასევე ზაპოროჟიესა და ხერსონის რეგიონების ოკუპირებულ ნაწილებში, უნდა გაიარონ სამედიცინო გამოკვლევა ინფექციური დაავადებების არარსებობისა და ნარკოტიკების მოხმარების ფაქტის დასადასტურებლად.

2022 წლის ივლისში პუტინმა ხელი მოაწერა განკარგულებას, რომელიც ავრცელებს რუსეთის მოქალაქეობის გამარტივებული მოპოვების შესაძლებლობას მთელი უკრაინის მაცხოვრებლებზე. მანამდე, 2019 წლის ივლისში, მან გაამარტივა რუსეთის მოქალაქეობის მიღების პროცედურა თვითგამოცხადებული დონეცკის და ლუგანსკის მაცხოვრებლებისთვის, ხოლო 2022 წლის მაისში — უკრაინის ოკუპირებული ზაპოროჟიესა და ხერსონის რეგიონების მაცხოვრებლებისთვის.