46 წლის ქართველი კაცი, რომელმაც ქალაქ გერაში, საზოგადოებრივ ტრანსპორტში, ცოლს აალებადი სითხე შეასხა, პოლიციას ჩაბარდა.

როგორც პოლიციის სპიკერმა განაცხადა, მამაკაცი დღეს დილით გერას პოლიციის განყოფილებას ჩაბარდა, დაკავებისას წინააღმდეგობა არ გაუწევია.

გერმანული მედია წერს, რომ დაკავებულს, სავარაუდოდ, წინასწარი პატიმრობა შეეფარდება. დაშავებული ქალი ამ დრომდე საავადმყოფოშია. სიცოცხლისათვის საშიში დაზიანებებით კლინიკაში ის ვერტმფრენით გადაიყვანეს.

შემთხვევა აღმოსავლეთ გერმანიის ქალაქ გერას ტრამვაიში 16 მარტს მოხდა. მას შემდეგ რაც 46 წლის მამაკაცმა ცოლს სითხე შეასხა, ქალს ცეცხლი წაეკიდა. გარშემო მყოფებმა ცეცხლი ახლომდებარე ცეცხლმაქრით ჩააქრეს. თავდამსხმელი შემთხვევის ადგილიდან მიიმალა. საერთაშორისო მედია წერს, რომ თავდამსხმელი წარმოშობის ქართველი, სავარაუდოდ, თენგიზ კაკიაშვილია.