თბილისის საბავშვო ბაღებში რეორგანიზაცია ცხადდება. შესაბამისი ბრძანება ბაღის თანამშრომლებმა, მათ შორის აღმზრდელებმა დღეს, 20 მარტს, მიიღეს — ამის შესახებ რადიო თავისუფლება წერს.

"ეცნობოს [...] ყველა თანამშრომელს ორგანიზაციული ცვლილებების დაწყების გამო სამსახურიდან მოსალოდნელი გათავისუფლების შესახებ," — წერია მერიის ბრძანებაში.

თბილისის საბავშვო ბაღები დედაქალაქის მერიის დაქვემდებარებაშია და მერიის პრესსამსახურის განცხადებით, რეორგანიზაცია თბილისის მერიის დაქვემდებარებულ ყველა სხვა უწყებაშია გამოცხადებული.

შეგახსენებთ, 24 იანვარს თბილისის მერმა, კახი კალაძემ განაცხადა, რომ მერიაში რეორგანიზაციაა დაწყებული და მომავალში კიდევ ბევრი ადამიანი გათავისუფლდება. კალაძე ამ გადაწყვეტილებას ხელშეკრულების ვადის ამოწურვით ხსნის.

"ხელმძღვანელმა პირებმა მიიღეს გადაწყვეტილება — როდესაც შენს თანამშრომელს ხელშეკრულების ვადა ეწურება, შენ იღებ გადაწყვეტილებას, გჭირდება თუ არა, ან ასრულებს თუ არა სამსახურებრივ მოვალეობას შესაბამის დონეზე, რომელიც შენ და შენს სამსახურს აკმაყოფილებს," — განაცხადა კალაძემ მიმდინარე წლის 24 იანვარს.

ქართული ოცნების გენერალურმა მდივანმა და თბილისის მერმა, კახა კალაძემ "ჩვეულებრივი სისულელე" უწოდა იმ აზრს, რომ თბილისის მერიაში თანამშრომლების განთავისუფლება პოლიტიკური ნიშნით ხდება. კალაძემ ასევე დასძინა, რომ მერიაში მომუშავე პირებს, რომლებსაც განსხვავებული პოლიტიკური შეხედულებები აქვთ და ხელი აქვთ მოწერილი პეტიციაზე — ისინი ჩვეულებრივ აგრძელებენ თბილისის მერიაში მუშაობას.

"ჩვეულებრივი სისულელეა, რომ თანამშრომლებს პოლიტიკური ნიშნით ვუშვებთ. [...] ბევრი მაგალითი შემიძლია მოგიყვანოთ იმ ადამიანების, რომლებსაც ჰქონდათ და ახლაც აქვთ განსხვავებული პოლიტიკური შეხედულება, ასევე, ხელი მოაწერეს პეტიციას, თუმცა, ისინი ჩვეულებრივ აგრძელებენ თბილისის მერიაში მუშაობას" — განაცხადა თბილისის მერმა.

იმავეს იმეორებს მერიის პრესსამსახურშიც, რომ "არანაირი პოლიტიკური ნიშნით არ ხდება რაიმე ცვლილება".

შეგახსენებთ, თბილისის მერიაში რეორგანიზაცია ბოლო რამდენიმე კვირაა მიმდინარეობს. კახა კალაძემ, ეს პროცესი საქართველოში მიმდინარე პროევროპული აქციების პარალელურად დაიწყო.

უშუალოდ თბილისის მერიიდან თანამშრომლების გათავისუფლება 2024 წლის დეკემბრის ბოლოს დაიწყეს — პირველ ეტაპზე სამსახურიდან დაითხოვეს პრესსამსახურის თანამშრომელი თაია მახარაშვილი და შშმ პირთა საკითხებზე მომუშავე საბჭოს აღმასრულებელი მდივანი გიგა სოფრომაძე. თუმცა პროცესი ამით არ დასრულებულა.

სავარაუდოდ პოლიტიკური ნიშნით განთავისუფლებულთა შორისაც მოხვდა თამთა კაჭახიძე — მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის კულტურის პროექტებისა და პროგრამების განყოფილების მეორე კატეგორიის უფროსი, რომელიც სპეციალისტის თანამდებობას იკავებდა.

"ადამიანები და რეჟიმი, რასაც მაშინ ვებრძოდი, სახელშეცვლილი, მაგრამ იგივეა და ახლაც მებრძვის. უბრალოდ უნდა იცოდეთ, რომ ამ ადამიანების, გათავისუფლებულების უკან არიან ოჯახები, მცირეწლოვანი შვილები და მოხუცებული მშობლები, ზოგიერთი ერთადერთი მარჩენალია ოჯახში და მათ ათავისუფლებთ ამ სიტყვებისთვის — "საქართველოს მომავალი ევროპაშია" — განაცხადა თამთა კაჭახიძემ.

აღსანიშნავია, რომ თბილისის მერიიდან გაათავისუფლეს ის თანამშრომლები, რომლებიც პეტიციაზე ხელმოწერით გმობდნენ ქართული ოცნების გადაწყვეტილებას, რადგან მიაჩნდათ, რომ ამით ქვეყნის ევროინტეგრაცია ჩერდებოდა.