საქართველოს პრემიერმინისტრის სპეციალური წარმომადგენელი რუსეთთან ურთიერთობის საკითხებში, ზურაბ აბაშიძე აცხადებს, რომ ქართული ღვინისა და ბორჯომის რუსეთში ექსპორტის აკრძალვასთან დაკავშირებით რუსეთის სახელმწიფო დუმის საერთაშორისო საკითხებზე მომუშავე კომიტეტის ინიციატივა, მხოლოდ ამ კომიტეტის წევრების აზრს გამოხატავს და ამიტომ მას საქართველოსთვის არსებითი მნიშვნელობა არ აქვს:

"რაიმე ახალ რეალობასთან, ახალ გადაწყვეტილებასთან საქმე არ გვაქვს. ეს ჯერ კიდევ 2014 წელს მოხდა. ამას ჩვენთვის განსაკუთრებული მნიშვნელობა არ აქვს, ეს მხოლოდ სევასტოპოლსა და ყირიმს არ ეხება, ჩვენც ანალოგიური ვითარება გვაქვს აფხაზეთსა და ცხინვალის რეგიონში, ამიტომ საქართველო, რა თქმა უნდა, ამ საკითხს განსაკუთრებული სენსიტიურობით ეკიდება".

Lenta.ru-ს ინფორმაციით, აღნიშნული კომიტეტი წარადგენს ინიციატივას, რომლის თანახმადაც დაგმობს საქართველოსა და კიდევ 5 ქვეყნის (ჩერნოგორიის, ალბანეთის, ლიხტენშტეინისა, ნორვეგიის) მიერ ევროკავშირის ყირიმისა და სევასტოპოლის წინააღმდეგ დაწესებული სანქციების პოლიტიკისთვის შეერთებას. გარდა ამისა, კომიტეტი ხელისუფლებას რეკომენდაციასაც მისცემს, რომ ამ უკანასკნელმა აღნიშნული ქვეყნების მიმართ საპასუხო ნაბიჯებიც გადადგას.

კომიტეტის წევრის, იან ზელინკსის განმარტებით, აღნიშნული ქმედებით საქართველომ რუსეთში ღვინისა და ბორჯომის ექსპორტის საკითხი საფრთხის ქვეშ დააყენა:

"მათი ღვინისა და მინერალური წყლის გარეშეც გავძლებთ. ჩვენი წყაროებიც ბევრი გვაქვს. ჩვენ გვჭირდება ყირიმის განვითარება, ღვინისა და ტურიზმის მიმართულებით. საქართველოსგან განსხვავებით, კარგი ღვინის, ყოველგვარი ქიმიკატების გარეშე".

20 ივლისს, ევროკავშირის წარმომადგენელმა, ფედერიკა მოგერინიმ განაცხადა, რომ ორგანიზაციის გადაწყვეტილებას, ყირიმისა და სევასტოპოლის წინააღმდეგ დაწესებული სანქციები 2017 წლის 23 ივნისამდე გაგრძელდეს, კიდევ 6 ქვეყანა, მათ შორის საქართველოც შეუერთდა.

2006-2007 წლებში რუსეთმა საქართველოს ღვინის, მინერალური წყლისა და ზოგიერთი სასოფლო-სამეურნეო პროდუქტის იმპორტი აკრძალა. 2013 წლის მაისში მხარეებმა სავაჭრო ურთიერთობა აღადგინეს, მოლაპარაკება ღვინისა და მინერალური წყლის ექსპორტის აღდგენასაც შეეხებოდა.