თურქეთის ხელისუფლება კვლავ მისცემს ამერიკის შეერთებულ შტატებსა და კოალიციას, გამოიყენონ თურქეთის საჰაერო სივრცე სირიაში ტერორისტული ორგანიზაცია ისლამური სახელმწიფოს პოზიციების დასაბომბად. ინფორმაციას პენტაგონზე დაყრდნობით Reuters ავრცელებს.

პენტაგონის განცხადებით, აშშ–ს მოკავშირე თურქეთმა სიტუაციის დასტაბილურების შემდეგ ტერორისტული ორგანიზაცია ისლამური სახელმწიფოს წინააღმდეგ შექმნილ კოალიციას ნება დართო ინჯირლიკის ავიაბაზა კვლავ გამოიყენოს. პენტაგონის თქმით, აღნიშნული შეთანხმება ინტენსიური მოლაპარაკების შედეგად იქნა მიღწეული და თურქეთმა პირობა დადო, რომ ამ ოპერაციას ხელს არ შეუშლის.

15 ივლისს დაწყებული სამხედრო გადატრიალების შემდეგ თურქეთის ხელისუფლებამ 6 ათასამდე პირი დააკავა, მათ შორის არიან როგორც მაღალი რანგის სამხედროები, ისე რიგითი ჯარისკაცები. ხელისუფლებამ ასევე დააპატიმრა რამდენიმე ასეული მოსამართლე, 2700–ზე მეტ მოსამართლესა და პროკურორს კი უფლებამოსილება შეუჩერდა. გადატრიალების მცდელობას თურქეთში 290 ადამიანი ემსხვერპლა, 1 400 დაიჭრა.

თურქეთის ხელისუფლება განიხილავს შესაძლებლობას, აღადგინოს სიკვდილით დასჯა მეამბოხეების დასასჯელად, რასაც მკვეთრად უარყოფითი რეაქციები მოყვა მისი დასავლელი მოკავშირეების მხრიდან.

როიტერსის ინფორმაციით, აშშ–ს სახელმწიფო მდივანს ტელეკომპანია NBC-ის ეთერში დღეს კითხეს, ხომ არ ცდილობს ერდოღანი გადატრიალების მცდელობა საკუთარი ძალაუფლების გასამყარებლად გამოიყენოს. აღნიშნულზე კერიმ განაცხადა, რომ ერდოღანის მსგავსი ქმედება იქნებოდა გამოწვევა ევროპასთან და ნატოსთან ურთიერთობაში.

თურქეთის ხელისუფლება გადატრიალების ორგანიზებაში ამერიკაში მცხოვრებ ფეტულა გიულენს ადანაშაულებს, რომელიც ერთ–ერთ გავლენიან ადამიანადაა მიჩნეული. ერდოღანის მთავრობამ საჯაროდ მოითხოვა აშშ–სგან მისი ექსტრადირება, თუმცა, ჯონ კერიმ განაცხადა, რომ თურქეთის ხელისუფლებას მათთვის ჯერ არ წარუდგენია საკმარისი მტკიცებულებები დანაშაულში გიულენის მონაწილეობის შესახებ და თუ აშშ ამ დოკუმენტებს მიიღებს, სწორედ ამის შემდეგ იმსჯელებს გიულენის თურქეთში ექსტრადირების შესაძლებლობაზე.