Reuters-ის ინფორმაციით, ერდოღანის თვითმფრინავი, რომელიც სტამბოლში უნდა დაშვებულიყო, მეამბოხეების ორ გამანადგურებელს მიზანში ჰქონდა ამოღებული, თუმცა თურქეთის ლიდერი სტამბოლში მშვიდობით ჩავიდა.

პრეზიდენტი გადატრიალების მცდელობის ღამეს შვებულებიდან ბრუნდებოდა, როდესაც ორი გამანადგურებელი F-16 მის თვითმფრინავს დაედევნა და რადარები ჩაუკეტა.

"თვითმფრინავს ორი სხვა F-16 იცავდა. დღემდე იდუმალებით მოცულია მიზეზი, თუ რატომ გადაიფიქრეს მისი ჩამოგდება" - განუცხადა როიტერს მოვლენებში გათვითცნობიერებულმა ყოფილმა სამხედრომ.

თურქეთის ორმა სხვა ოფიციალურმა პირმა როიტერს დაუდასტურა, რომ რეჯეპ ტაიპ ერდოღანის თვითმფრინავს მიწაზე დაშვებამდე "პრობლემები შეუქმნეს". ერთ-ერთმა ოფიციალურმა პირმა განაცხადა, რომ ორ გამანადგურებელს ამბოხებულებისგან პრეზიდენტის თვითმფრინავის ჩამოგდების ბრძანება ჰქონდათ მიღებული, თუმცა, მათ ეს არ გააკეთეს. აღნიშნულ პირებს დამატებითი დეტალები არ გაუჟღერებიათ.

ერდოღანმა განაცხადა, რომ გადატრიალების მცდელობის ღამეს, აჯანყებულებმა მასზე თავდასხმა სცადეს და ის ადგილი დაბომბეს, რომელშიც ის ისვენებდა. პრეზიდენტის თქმით, მან თავდასხმას "რამდენიმე წუთით გამოასწრო".

ოფიციალური პირების თქმით, თავდასხმის მცდელობა იყო თურქეთის პრემიერ ბინალი ილიდრიმზეც, თუმცა მან "ძლივს მოასწრო" თავის დაღწევა.