7 ივნისს საყოველთაო ნათლობის 73-ე ეტაპი გაიმართება. ინფორმაციას საპატრიარქოს საზოგადოებასთან ურთიერთობის სამსახური ავრცელებს. მათი ცნობით, ნათლობა სამების ტაძარში გაიმართება და 20:00 საათზე შიო III ახალ ნათელღებულებს დალოცავს.

"ამა წლის 7 ივნისს თბილისის ყოვლადწმინდა სამების სახელობის საპატრიარქო ტაძარში გაიმართება მორიგი, 73-ე ეტაპი, კათოლიკოს-პატრიარქის მიერ მესამე და შემდგომი ბავშვის მონათლვისა.

20:00 საათზე უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი შიო III დალოცავს ახალ ნათელღებულებს", — წერია საპატრიარქოს საზოგადოებასთან ურთიერთობის სამსახურის განცხადებაში.

საყოველთაო ნათლობის იდეა საქართველოს კათოლიკოს-პატრიარქს, ილია მეორს ეკუთვნის. პირველი საყოველთაო ნათლობა 2008 წელს გაიმართა.