ფინეთის პრეზიდენტმა, ალექსანდრ სტუბმა, ბევრად უფრო დიდი ევროკავშირის შესახებ საკუთარი ხედვა წარადგინა და თქვა, რომ ევროკავშირი 40 ევროპულ ან არაევროპულ სახელმწიფომდე უნდა გაფართოვდეს და ამ კონტექსტში ახსენა უკრაინა, მოლდოვა, საქართველო, თურქეთი და კანადაც.

მისი თქმით, 27-წევრიანმა ბლოკმა "მასშტაბურად უნდა იაზროვნოს" და გლობალურ ასპარეზზე ძალის პროეცირებისთვის არსებული მომენტი ხელიდან არ უნდა გაუშვას. ინფორმაციას CNBC ავრცელებს.

ოთხშაბათს, ფინეთის დედაქალაქში გამართულ ენერგეტიკულ კონფერენციაზე სიტყვით გამოსვლისას, სტუბმა აღნიშნა, რომ ევროკავშირმა წევრთა რაოდენობის 40 სახელმწიფომდე გაზრდას უნდა შეუწყოს ხელი და პოტენციურ კანდიდატებად დიდი ბრიტანეთი, კანადა, თურქეთი, ნორვეგია და ისლანდია დაასახელა.

სტუბმა კონფერენციაზე, Eurelectric Power Summit, განაცხადა, რომ ევროკავშირის გაფართოებისთვის "შესაძლებლობების ფანჯარა საკმაოდ ვიწროა, რადგან როდესაც უკრაინაში ომი დასრულდება და, შესაძლოა, აშშ-ის ადმინისტრაციაც შეიცვლება (არ ვიცი), მაშინ ადამიანები გაზის პედალს ფეხს აუშვებენ და ისევ უმნიშვნელო საკითხებზე დაიწყებენ კინკლაობას".

ფინეთის პრეზიდენტმა დასძინა, რომ "ევროპული სტრატეგიული ავტონომია თუ ევროპული გეოპოლიტიკური ძალა ხშირად ეფუძნება ზომასა და მასშტაბს, ხოლო საუკეთესო ევროპული პოლიტიკა ისტორიაში ყოველთვის იყო ევროკავშირის გაფართოება".

"ამ მომენტში ჩვენ გვჭირდება მასშტაბური ფიქრი და გეოგრაფიულად უნდა გავფართოვდეთ, ან სულ მცირე, შევქმნათ ისეთი მოქნილი წევრობის ფორმატები, რომლებიც გააერთიანებს ჯამში 40 ევროპულ — ან თუნდაც არაევროპულ — სახელმწიფოს", — განაცხადა სტუბმა.

CNBC-ის ცნობით, ფინეთის პრეზიდენტის თქმით, ევროკავშირმა მზერა დასავლეთ ფლანგისკენაც უნდა მიმართოს და დიდი ბრიტანეთი, რომელმაც ბლოკი 2020 წელს დატოვა, კვლავ ოჯახში დააბრუნოს, ან სულ მცირე, "რაც შეიძლება მეტად დააახლოოს".

სტუბის აზრით, კიდევ ერთ ვარიანტად კანადაც უნდა განიხილებოდეს.

"განა მშვენიერი არ იქნება, თუ კანადა ამერიკის შეერთებული შტატების 51-ე შტატის ნაცვლად, ევროკავშირის 28-ე სახელმწიფო გახდება?", — განაცხადა მან.

მან კომენტარი გააკეთა ევროკავშირში თურქეთის გაწევრიანებაზეც. მისი თქმით, უკრაინის, მოლდოვასა და საქართველოს განხილვის შემდეგ, "სერიოზულად უნდა დავფიქრდეთ თურქეთზე".

"აღარავინ საუბრობს თურქეთზე და ჩვენ უნდა გავხსნათ ჩვენი გონება, რათა გავიგოთ, რომ უსაფრთხოების თვალსაზრისით, თურქეთი მაქსიმალურად ახლოს უნდა იყოს", — თქვა სტაბმა.