ფრანგ-ირანელი მწერალი მარჯან სატრაპი 56 წლის ასაკში გარდაიცვალა.

"მარჯან სატრაპი სევდისგან გარდაიცვალა — ეს მოხდა მისი მეუღლისა და ცხოვრების სიყვარულის, მატიას რიპას გარდაცვალებიდან ცოტა მეტი, ერთი წლის შემდეგ," — ნათქვამია მისი ოჯახის წევრების განცხადებაში, რომელსაც AFP ავრცელებს.

სატრაპის მეუღლე, შვედი პროდიუსერი, მსახიობი და სცენარისტი, 2025 წლის 8 აპრილს გარდაიცვალა. სატრაპი, რომელიც ირანის თეოკრატიული ხელისუფლების ღია კრიტიკოსი იყო, 1994 წელს საფრანგეთში გადავიდა, ხოლო 2006 წელს საფრანგეთის მოქალაქეობა მიიღო.

მისი წიგნი Persepolis მოგვითხრობს სატრაპის ბავშვობასა და ახალგაზრდობაზე თეირანში, სადაც იგი 1979 წლის ისლამური რევოლუციის შემდეგ ირანის ისლამური ხელისუფლების მიერ დაწესებულ შეზღუდვებს ებრძოდა. მოგვიანებით, მშობლებმა ის ევროპაში გაგზავნეს, რათა ემიგრაციაში ახალი ცხოვრება დაეწყო.

გასულ წელს სატრაპიმ უარი თქვა საფრანგეთის უმაღლეს სახელმწიფო ჯილდო Légion d'honneur-ზე. მისი თქმით, მიზეზი საფრანგეთის "ფარისევლური" პოლიტიკა იყო ირანის მიმართ, კერძოდ, სავიზო შეზღუდვები, რომლებიც ირანელ დისიდენტებს საფრანგეთში გამგზავრების შესაძლებლობას უზღუდავდა.