მაისში საფრანგეთმა საქართველოდან დაზვერვის ორი აგენტი გაიწვია — ინფორმაციას ფრანგული გამოცემა Intelligence Online-ზე დაყწდონიბით "რადიო თავისუფლება" ავრცელებს. მათი ცნობით, საფრანგეთის საგარეო დაზვერვის სააგენტოს (DSGE) ეს გადაწყვეტილება მიღებული იქნა მას შემდეგ, რაც სუს-მა DSGE-ის მიერ დაქირავებული "ბიძინა ივანიშვილთან დაახლოებული მნიშვნელოვანი პირი" დააკავა. გამოცემა ფინანსთა სამინისტროს საგამოძიებო სამსახურის საზოგადოებასთან ურთიერთობის სამმართველოს ყოფილი უფროსის, გიორგი უძილაურის ჯაშუშობის ბრალდებით დაკავებას გულისხმობს.

ფრანგული გამოცემა ასევე ხაზს უსვამს, რომ სუს-ს შეეძლო დაესახელებინა, რომელი ქვეყნისთვის ჯაშუშობდა უძილაური, მაგრამ მათ მხოლოდ "დასავლური სახელმწიფო" ახსენეს.

8 მაისს, გიორგი უძილაურის დაკავებიდან მალევე სამართალდამცავი ორგანოების კოორდინაციის საკითხებში სახელმწიფო მინისტრმა, მამუკა მდინარაძემ სახელმწიფო უსაფრთხოების სამსახურს მოუწოდა, რამდენიმე საათში გაევრცელებინა ვიდეო, რომელშიც დანაშაულის ჩადენის ამსახველი კადრები იქნებოდა ასახული. მდინარაძემ ბრიფინგზე ასევე მოუწოდა "დასავლეთს", რომ უძილაურის დაკავება მინიშნებად მიეღოთ და სადაზვერვო საქმიანობა შეეწყვიტათ.

შეგახსენებთ, ფინანსთა სამინისტროს საგამოძიებო სამსახურის საზოგადოებასთან ურთიერთობის სამმართველოს ყოფილი უფროსი, მანამდე კი "ქართუ ჯგუფის" საზოგადოებასთან ურთიერთობის სამსახურის უფროსის გიორგი უძილაური მიმდინარე წლის 5 მაისს ჯაშუშობის ბრალდებით დააკავეს.

საქმეზე გამოძიება სისხლის სამართლის კოდექსის 314-ე მუხლის პირველი ნაწილით მიმდინარეობს, რაც სასჯელის სახით 8-დან 12 წლამდე თავისუფლების აღკვეთას ითვალისწინებს.