სტატია შეიცავს სპოილერებს Euphoria-ს მესამე სეზონიდან.

რამდენიმე დღის წინ Euphoria მესამე სეზონით დასრულდა. სერიალის ფინალმა ფანებში დიდი ემოციები და განხილვები გამოიწვია. Euphoria-ს დასასრული და სიუჟეტი ასევე ემოციური იყო სერიალის გარდაცვლილი მსახიობის, ანგუს კლაუდის, დედისთვისაც.

"სოციალურ ქსელებში გამოხატული უდიდესი ემოციური მხარდაჭერა, რომლითაც პატივს მიაგებენ ჩემი საყვარელი შვილის ლამაზ სულს, ყველაფერზე მეტყველებს", — განაცხადა მსახიობის დედამ, ლიზა კლაუდმა, TMZ-თან ინტერვიუში.

სერიალის ბოლო ეპიზოდში ანგუს კლაუდისა და ზენდეიას აქამდე გამოუქვეყნებელი საარქივო კადრები ვიხილეთ. ლიზას თქმით, ანგუსი ფინალში ამ სახით რომ გამოჩნდებოდა, მანამდე არ იცოდა, თუმცა ამის მოლოდინი ჰქონდა.

ფოტო: x

რაც შეეხება სერიალის სიუჟეტს, სემ ლევინსონის თქმით, რუსთვის სულ სხვაგვარი ფინალი ჰქონდა ჩაფიქრებული, თუმცა გეგმები სწორედ ანგუს კლაუდის ტრაგიკულმა გარდაცვალებამ შეცვალა. კლაუდი, რომელიც პირველ ორ სეზონში ნარკოდილერ ფეზკოს როლს ასრულებდა, 2023 წელს, 25 წლის ასაკში, ფენტანილის ზედოზირებით გარდაიცვალა. სწორედ ამ პერიოდში მუშაობდა ლევინსონი მესამე, ფინალურ სეზონზე.

"ფენტანილის ასეთი ფართო გავრცელება ყოველთვის ძალიან მაშფოთებდა. ეს არის თემა, რომელსაც სერიალის სხვადასხვა სეზონში შევეხე. მაგრამ მას შემდეგ, რაც ანგუსი გარდაიცვალა, სცენარის ხელახლა გადააზრება მომიწია. მივხვდი, რომ დღეს შეუძლებელია დაწერო ამბავი დამოკიდებულებაზე იმ რეალური და სასტიკი შედეგების ჩვენების გარეშე, რომლებიც მას აუცილებლად მოჰყვება. ადამიანების უმრავლესობას მეორე შანსი უბრალოდ არ ეძლევა. ფენტანილს შეუძლია თვალის დახამხამებაში გამოგასალმოს სიცოცხლეს", — ამბობს სემ ლევინსონი.

ლიზა კლაუდის აზრით, სემ ლევინსონმა ანგუსის ხსოვნას ღირსეულად მიაგო პატივი და სერიალის ბოლო ნაწილზე მუშაობის პროცესში შოუს შემქმნელს სრულად ენდობოდა.

ასევე იხილეთ: