აშშ-ის პრეზიდენტი დონალდ ტრამპი NATO-ს წევრი ქვეყნების ლიდერთა სამიტს დაესწრება, რომელიც ივლისის დასაწყისში თურქეთში გაიმართება. ამის შესახებ ოთხშაბათს აშშ-ის სახელმწიფო მდივანმა მარკო რუბიომ განაცხადა. ინფორმაციას Reuters ავრცელებს.

Reuters-ის ცნობით, მიუხედავად იმისა, რომ ამერიკის პრეზიდენტები, როგორც ალიანსის ლიდერი ქვეყნის მეთაურები, თითქმის ყოველთვის ესწრებიან NATO-ს სამიტებს, წელს ტრამპის დასწრება კითხვის ნიშნის ქვეშ დგებოდა. ამის მიზეზი გახდა მისი არაერთგზისი მწვავე უკმაყოფილება NATO-ს მიმართ — ტრამპი პარტნიორებს აკრიტიკებდა იმის გამო, რასაც ის ირანითან ომში აშშ-ის დახმარებაზე უარის თქმად მიიჩნევს.

ოთხშაბათს კონგრესში გამართულ მოსმენაზე სიტყვით გამოსვლისას რუბიო ტრამპის ამ იმედგაცრუებას შეეხო და აღნიშნა, რომ პრეზიდენტის მთავარი გაღიზიანება ზოგიერთი წევრის გადაწყვეტილებას უკავშირდება, რომლებმაც კრიზისის დროს აშშ-ს საკუთარ ტერიტორიაზე არსებული სამხედრო ბაზების გამოყენების უფლება არ მისცეს.

თუმცა, რუბიოს თქმით, მიუხედავად ალიანსის მიმართ არსებული იმედგაცრუებისა, ტრამპი შეხვედრას, რომელიც თურქეთის დედაქალაქში, ანკარაში 7-8 ივლისს გაიმართება, მაინც დაესწრება:

"ამერიკის შეერთებული შტატები კვლავ რჩება NATO-ს ალიანსში და ჩვენ ვიქნებით თურქეთში, რათა ყველა ამ თემაზე ვისაუბროთ. თავად პრეზიდენტი დაესწრება NATO-ს სახელმწიფოთა მეთაურების მომავალ შეხვედრას, სადაც ყველა ეს პუნქტი ნათელი გახდება", — განაცხადა რუბიომ.

შეგახსენებთ, NATO-ს რამდენიმე ქვეყანამ უარი თქვა აშშ-ის სამხედრო კამპანიის მხარდაჭერაზე ირანის წინააღმდეგ — მათ აშშ-ის სამხედრო თვითმფრინავებს საკუთარი საჰაერო სივრცის გამოყენება აუკრძალეს და უარი განაცხადეს სამხედრო-საზღვაო ძალების გაგზავნაზე, რომლებიც ენერგოტანკერებისთვის ჰორმუზის სრუტის გახსნას უნდა დახმარებოდნენ.

ევროპელმა ლიდერებმა უარი თქვეს ირანის წინააღმდეგ აშშ-ის და ისრაელის ერთობლივ სამხედრო ოპერაციებში პირდაპირ ჩართვაზე. Reuters წერს, რომ მათ არაპროგნოზირებად კონფლიქტში ჩათრევა, რომლის მიზნებიც ბოლომდე არ ესმით და რომელიც მათსავე მოქალაქეებში არაპოპულარულია, აფრთხობთ.