საერთაშორისო გამჭვირვალობა-საქართველო აცხადებს, რომ მიუხედავად დახურული სხდომისა, ჟურნალისტებს ჰქონდათ სრული უფლება ციანიდის საქმის შესახებ მოპოვებული მასალა გაესაჯაროვებინათ.

TI-ს განმარტებით, კანონმდებლობის თანახმად, ჟურნალისტი არ არის ასევე ვალდებული იყოს მოწმე, გათქვას ინფორმაციის წყარო და მისცეს ჩვენება პროფესიული საქმიანობისას მიღებულ ინფორმაციასთან დაკავშირებით.

საერთაშორისო გამჭვირვალობა-საქართველო მოუწოდებს ხელისუფლების წარმომადგენლებს თავი შეიკავონ ისეთი განცხადებებისგან, რომელიც ზღუდავს მედიის ლეგიტიმურ საქმიანობას.

საერთაშორისო გამჭვირვალობა-საქართველო მიმართავს საქართველოს პროკურატურას იმოქმედოს საქართველოს კანონმდებლობისა და საუკეთესო საერთაშორისო გამოცდილების შესაბამისად და არ დაიბაროს ჟურნალისტები დაკითხვაზე მედიაში გავრცელებული ჩანაწერების გამო.

განცხადებაში ნათქვამია, რომ მაღალი საზოგადოებრივი ინტერესის საქმის თაობაზე ჩანაწერების გავრცელების ან წყაროს გაუთქმელობის გამო, მედიის წარმომადგენელთა არათუ პასუხისგებაში მიცემა, არამედ შესაძლო დაკითხვაზე დაბარებაც კი, სამომავლოდ ნეგატიურად იმოქმედებს მედიის მიერ საზოგადოებისათვის მნიშვნელოვანი ამბების გაშუქებაზე.

ციანიდის საქმის მასალების გასაჯაროების გამო ჟურნალისტის პასუხისმგებლობის საკითხი პირველმა საპროკურორო საბჭოს წევრმა ირმა ჭკადუამ დააყენა, რომელიც ამ საქმეში მოწმეა და გამოქვეყნებულ ფარულ ჩანაწერებშიც ფიგურირებს.

საქართველოს პარლამენტის იურიდიულ საკითხთა კომიტეტის თავმჯდომარე ეკა ბესელია, რომელიც ასევე ნახსენებია ჩანაწერში, მედიის მიერ დახურული სხდომის დამატებითი მასალების გამოქვეყნებას ფეისბუქ გვერდზე გამოეხმაურა და ჟურნალისტების ქმედებას კანონდარღვევა უწოდა.

საქართველოს საპატრიარქომაც გაავრცელა განცხადება მედიის მიერ ბოლო პერიოდში გავრცელებული ჩანაწერის შესახებ, რომელშიც უარყო საპატრიარქოს წარმომადგენლებისა და ჩანაწერში მოხსენიებული პირების მხრიდან რაიმე კანონდარღვევა და ტელეკომპანია რუსთავი 2-ს არაობიექტურობასა და ჟურნალისტური ეთიკის სტანდარტების დარღვევაში დასდო ბრალი.

TI-ს განცხადებით, ციანიდის საქმის მიმართ, რომლის სასამართლო სხდომის დახურვამ კრიტიკა დაიმსახურა, მომეტებული საჯარო ინტერესი არსებობს, მედიის მიერ გავრცელებულ ჩანაწერებს კი გარკვეული წვლილი შეაქვს საზოგადოებაში ამ თემაზე არსებულ დისკუსიაში.

აღნიშნული ჩანაწერის მიხედვით, სოსო ოხანაშვილი ამბობს, რომ კონკრეტული პირები საპატრიარქოში შესაწყალებელ პატიმართა სიის შედგენაში, გარკვეული თანხის სანაცვლოდ, მონაწილეობდნენ. რუსთავი 2-ის ცნობით, ილია მეორის დაცვის ყოფილი უფროსი სიის შედგენის მონაწილეებად პარლამენტის დეპუტატ ეკა ბესელიას, უფლებადამცველ ნანა კაკაბაძეს, პატრიარქის მდივან-რეფერანტ შორენა თეთრუაშვილსა და საპროკურორო საბჭოს წევრ ირმა ჭკადუას ასახელებს.