საქართველოს პარლამენტის დეპუტატი ეკა ბესელია მიიჩნევს, რომ ციანიდის საქმის დახურული პროცესის მოპოვებული ჩანაწერის გასაჯაროება კანონით აკრძალულია და გამონაკლისი ჟურნალისტებისთვის არ არის დაშვებული. ამის შესახებ ბესელია ფეისბუკზე წერს.

ეკა ბესელიას აზრით, რუსთავი 2 დიდი ხანია "ღიად და დაუფარავად ებრძვის საქართველოს პატრიარქს და საპატრიარქოს".

ბესელიას სტატუსი გუშინ, 14 ოქტომბერს გავრცელებულ აუდიო ჩანაწერს ეხება, რომელზეც რუსთავი 2-ის ინფორმაციით, ილია მეორის დაცვის ყოფილი უფროსის, სოსო ოხანაშვილის ჩვენებაა ასახული. ეკა ბესელიას მიაჩნია, რომ ჩანაწერში გაუგებარი და არაფრისმთქმელი ფრაზები ისმის:

"ნაწილობრივ ერეოდა (რაში ერეოდა? ვისთან? ვის გამო???) ან ფრაზა "არ გამოდიოდა მთელი თვე საპატრიარქოდან" - დიდი ბედნიერებაა, მთელი თვე იყო პატრიარქთან, მაგრამ სადაა ეგ ბედნიერება? ეს ფრაზები შეიძლებოდა გამოყენებულიყო ისეთი ცილისმწამებლური ბრალდებებისთვის რაც გუშინ გაახმოვანა ჟურნალისტმა ნოდარ მელაძემ??"

ბესელია ელოდება ჟურნალისტური ეთიკის ქარტიის "რეაგირებას", თუმცა უცნობია მიმართა, თუ არა განცხადებით ორგანიზაციას დეპუტატმა:

"აქვე შევახსენებ ამ ტელევიზიას, რომ მე მსგავსი ცილისწამების გამო გამოვააშკარავე და სასამართლო პროცესი მოვუგე მატყუარა ელისაშვილს. მას დაევალა სწორედ რუსთავი 2-ის ეთერში უარყოფა მისი ცრუ განცხადებების. იქნებ ეს გაიხსენოს ამ ტელევიზიამ და სასამართლო გადაწყვეტილების შესრულება შეახსენოს მატყუარა და თაღლით მერობის კანდიდატს?!"

აღნიშნული ჩანაწერის მიხედვით, სოსო ოხანაშვილი ამბობს, რომ კონკრეტული პირები საპატრიარქოში შესაწყალებელ პატიმართა სიის შედგენაში, გარკვეული თანხის სანაცვლოდ, მონაწილეობდნენ. რუსთავი 2-ის ცნობით, ილია მეორის დაცვის ყოფილი უფროსი სიის შედგენის მონაწილეებად პარლამენტის დეპუტატ ეკა ბესელიას, უფლებადამცველ ნანა კაკაბაძეს, პატრიარქის მდივან-რეფერანტ შორენა თეთრუაშვილსა და საპროკურორო საბჭოს წევრ ირმა ჭკადუას ასახელებს.