საქართველოს მართლმადიდებელი ეკლესიის საპატრიარქოში მიაჩნიათ, რომ ე.წ. ციანიდის საქმის სასამართლო სხდომების ჩანაწერების მედიაში გავრცელება ეთიკის უხეში დარღვევაა. საპატრიარქოში ამბობენ, რომ მსგავსი ჩანაწერების გავრცელება არხის არაობიექტურობაზე მეტყველებს და მათ დაინტერესებულ მხარედ წარმოაჩენს.

"რვა თვეზე მეტია საქართველოს მართლმადიდებელი ეკლესია ციანიდის საქმესთან დაკავშირებით სხვადასხვა ძალების მხრიდან მუდმივ შემოტევებს განიცდის", - აცხადებენ საპატრიარქოში, სადაც რუსთავი 2-ის მიერ 14 ოქტომბერს საპატრიარქოს მხრიდან გარკვეული ანაზღაურების ფასად მსჯავრდებულების გათავისუფლების შესახებ მასალასაც გამოეხმაურნენ.

საპატრიარქოში გავრცელებულ ინფორმაციას ჭორს უწოდებენ და განმარტავენ, რომ მსჯავრდებულთა შეწყალების საკითხთა შემსწავლელი კომისია სასჯელაღსრულების დაწესებულებებში მყოფთა შესახებ მხოლოდ სარეკომენდაციო მასალებს ამზადებს და მას მსჯავრდებულთა შეწყალებასთან შეხება არა აქვს.

"ვფიქრობთ, მიზანმიმართული ქმედებიდან მომდინარეობდა კურიერში გაჟღერებული მეორე თემაც, – დოკუმენტებზე შორენა თეთრუაშვილის ხელმოწერასთან დაკავშირებული უსაფუძვლო ბრალდებაა", - ამბობენ საპატრიარქოში.